Shillong, Lber 28 : U Symbud Myntri Rangbah ba peit ia ka Tnad Pohiing, u Bah Prestone Tynsong, ula kyntait ïa ka jingkynnoh ba la mih sa kawei pat ka kynhun jaidbynriew ha ka jylla lane kata ka “High Level Tribe”.
U Dr. Celestine Lyngdoh, MLA ka Congress, hynnin ka sngi haba ïashim bynta ha ka jingïatai halor ka Mangtyngka, u la ong ba Meghalaya nalor ki lai tylli ki jaitbynriew Riewlum, la mih sa kawei pat ka kynhun jaidbynriew ba la tip kum ki “High Level Tribe”.
U Bah Prestone, u la ong ba ki dkhot ka ïingdorbar kim lah shah shuh kynnoh na kaei kaba ki ïoh sngew sharum shaneng, hynrei haba kynnoh dei ban don ryngkat ki sakhi satar kiba biang.
Haba pynpaw ba kyntien ‘High level’ ka mih ha ki iew ki hat, u Symbud Myntri ula ong ba ha ka por ba mih bha kane ka kyntien, kum u Nongaiktien ka Sorkar MDA I, u la ju pynshai da kaba ong balei ba kita kiba ju kynnoh ba don ki High Level kim wanrah ki sakhi satar bad ki kyrteng nangta sa ujor ruh da ka ejahar. “Hynrei ym shym la don satia kiba leh kumta”, u la ong.
Haba ïadei bad ka jingong ki dkhot ka Liang Pyrshah ba ki Pulit ki la pynlehraiñ ïa ka jylla, kat haduh ba ka Iingkashari Meghalaya High Court ban phah pahara da ka CISF na ka bynta ban tehlakam ia ka jingkhaii tuh ia u dewiong ha Jylla, u Symbud Myntri Rangbah ula ong ba ki Pulit ki leh ïa ka kam, hynrei haba ka ïingbishar ka bthah da kumwei patm ka sorkar kan sa peit kaei kaba dei ban leh.
U Dr Celestine Lyngdoh haba ïashim bynta ha ka Cut Motion, ula kyntu ïa ka Sorkar Jylla ban ai laitluid ïa ki Pulit ba kin treikam bad ban ailad ïa ki ba kin trei la ka kam.
Da kaba ïada ïa ka tnad treikam la jong, u Bah Prestone ula ong ba ka Sorkar kala ai ka kti ba laitluid ia ki Pulit ban tehlakam ia kiei kiei baroh la ka dei ka kam bymman lane ka jingshongsuk shongshngain lane ka kam ba iadei bad ka jingshngain ka Jylla haba bynrap ba ka Sorkar kam ju mushlia satia ia ka jingtrei kam jong ki Pulit.
