La jubab ka kynhun ba siat ïap ïa u Bah Cherish, yn shong bishar ka Sorkar

0

Shillong, Lber 28: Symbud Myntri Rangbah ba peit ïa ka tnad pohïing, u Bah Prestone Tynsong, u la ïathuh ba ka kynhun ba siat ïap ïa u Bah Cherishterfield Thangkhiew lane kata ka Tactical- I Team, ka la ai ka jubab sha ka sorkar bad ka sorkar kan sa shong bishar ïa kane.
Ïa kane, u Bah Prestone u la ïathuh haba juhab ïa ka ‘Cut Motion’ ba la wanrah lang da u Bah Ardent Miller Basaïawmoit jong ka VPP bad u Dr. Celestine Lyngdoh jong ka Congress.
“Ngam lah ban batai mano ba ai hukum ban siat ïa u Bah Cherish”, la ong u Bah Prestone haba u Bah Ardent u la kylli bad kwah ban ïoh jingtip mano ba la ai hukum ban siat ïap ïa u General Secretary barim ka HNLC.
Ha kajuh ka por u Symbud Myntri ka tnad pohïing, u la ong ba ka sorkar haba ka phah ïa ki Pulit ban thwet ïa u Bah Cherish ka la phah ban kem im ïa u ym bat siat ïap. U la ong ba ka Inquiry Commission ka ladep ai ïa ka kaiphot bad la wanrah ruh ïa kane ka kaiphot hapoh ïingdorbar. Katkum ka jingbthah jong ka Commission, ka sorkar ruh ka la leh ïa kaba donkam ha kaba ka la pan jingshai na kawei na ki Kynhun kiba la leit kem ïa u Bah Cherish.
Ha shuwa jong kane, u Bah Ardent, haba wanrah ïa ka Cut Motion halor ka jingtreikam ka tnad Pulit, u la ong ba ki paidbah jong ka Mawlai bad kiba haïing hasem u Bah Cherish ki dang ap ïa ka jingbishar kaba hok, namar kumno ki bor Pulit kin siat ïap ïa u briew uba thiah pang ha ïing.
Lah ban kdew hangne ba u GS barim ka HNLC, u la shah siat ïap ha ïing jong u ha Mawlai Kynton Massar ha ka step phyrngab jong ka 13 tarik u Nailar 2021. Ka jingshah siat ïap jong u, ka la pynkhih ïa ka Mawlai bad ïa ka Ri Khasi hi baroh kawei. Ha ka sngi tep ïa u, ki paidbah na kylleng ki la ïatuid ban leit on tep ïa u ha ka 15 tarik uNailar 2021, kaba dei ka sngi rakhe ïa ka jingïoh laitluid ka ri India.
Hadien kane la thung ïa ka Inquiry Commission ba la khlieh da u Justice T. Vaiphei, u Chairman jong ka Meghala Human Rights Commission.

Leave A Reply

Your email address will not be published.