Shillong, Lber 11: U CEM ka KHADC u Bah Pynïaid Sing Syiem ha ka Dorbar Mang tyngka u la ïathuh ba ka KHADC haduh mynta ka la ïoh lum pisa (revenue) naduh u ïaïong u snem ba la dep haduh u bnai Lber mynta u snem (2023-2024) ka la kot sha ka T. 73,39,2054 klur bad kadei kaba la ïoh jingkheiñ kaba dei naduh ka 1.04.23 haduh une u snem 2024.
Haba jubab ïa ka jingkylli ba la wanrah da u Nongïalam ka Liang Ïatei hapoh ka dorbar mang tyngka ha ka sngi Nyngkong kaba dei ruh ka sngi sdang jong ka KHADC.
U MDC ka Sohra u Bah Titosstarwell Chyne u la wanrah ïa kane ka jingkylli halor ka nongrim ban tip bad maham lypa ruh ïoh ba ka KHADC kan mad ïa ka jingduna pisa kumba la jia ïa ki artylli ki ADC ka JHADC bad GHADC ka jylla bad u la kwah ban tip bniah halor ki jingïoh lum pisa ka KHADC.
Halor kane u CEM u la batai ba na ka Professional Tax ka pisa ba lah lum ka long T. 1,8,27,617, katba ka Fee na ka Tnat ki kam Khaïi la ïoh T. 3, 59, 93,615 klur, na ka land revenue ka jingïoh ka long T. 43,40,160, na ka tnat Forest ka long T. 1,88,68,272, na ka Civil Works Department ka la ïoh T. 16,23,41 lak, na ka Administration of Justice lyngba ki Court Fee ka long T. 33,42,314.
Katba na ki Miscellaneous ka long T. 8,58,954, na ki Toll gate ka long T. 25, 21 lak, na ka Building permission ka long T. 88,67,709, na ki ïew kum ka Ïew Laitlyngkot bad Byrni hat la ïoh T. 16,52,10, na ka printing and missionery T. 21,945, ka khajna na ki jingri ka long T. 1 lak, na ka grand in aid ka long T. 23 lak.
Katba halor ka bhah jong ki Major mineral kum u Dewïong ka long 60% sha ka KHADC bad 40% sha ka sorkar jylla ha kaba ïa kane khlem pat ïoh haduh mynta bad haba ïadei bad ki minor mineral kum u Mawshun bad kiwei ka bhah ka long 25% sha ka Council bad 75% sha ka sorkar jylla bad ïa kane la ïoh naduh u bnai Ïaïong mynshem snem haduh Lber mynta u snem ka la poi T. 39 klur tam, kumta ka jingïoh lum pisa da ka council ba la lum hi dalade ka la kot sha ka T. 73,39,20,54 klur ha ka shisnem ha kaba da kane la ïoh ban siew ïa ka tulop ki nongtrei kiba la ïoh jingpynskhem ne Permanent Staff kiba don malu mala kumba 800 ngut bad ki nongtrei contract basis ne Casual kiba don kumba 100 ngut kaba ha ka shibnai ka Council ka hap pynlut T. 5 klur tam ne duna malu mala.
