Shillong, Lber 11: U President ka Hynniewtrep National Youth Front (HNYF) u Bah Sadon Blah, ula ong ba ka seng kam lah pdiang ïa ka jingpynlong ’langknia jong ka Tnad Pulit ïa ki Nongïalam Sengbhalang.
Une u Nongïalam Sengbhalang ula kynthoh ïa kane halor ka jingshah kem u dkhot ka seng (HNYF) halor ka jingkynnoh donkti ha ka jingpynbthei bomb IED ha Them Metor, kaba jia ha ka miet sngi Saitjain.
U Bah Sadon u pyntip ba une u dkhot ba shah kem u kyrteng u Bah Thyrson Lymba ba 55 snem ka rta na Dawki bad u dei u Nongïalam bala rim bha ha ka seng, uba bat mynta ïa ka kam kum u Disciplinary Secretary.
U Bah Sadon uba la leit ïakynduh ïa u Superintendent of Police ka East Khasi Hills Rituraj Ravi ban pan jingshai halor kane ka jingkem, ula pyntip “Ngi la kren shai ha u SP ba ka seng kam ngeit satia ba un donkti ha ka jingpynbthei bomb”.
Haba pyntip ruh ba u SP ula buh jingkylli la u Bah Thyrson u don bynta ha ka jingïakren ïasuk jong ka HNLC, u Bah Sadon ula ong “Naduh ka sngi ba nyngkong, ha ka por ba ngi leit shaw ïa ki nongïalam ka HNLC ban wan sha ka miej ïakren ïasuk, ha ryngkat ki Pulit bad ki Ophisar sorkar, ngi hap ban leit shaw na ki shnong kiba ma nga ruh ngam tip bad ki Pulit ruh kim tip hynrei namar ba u dei u nongshong shnong ka Dawki, ngi hap ban pan ïa ka jingïarap jong u ban leit shaw. Ngi la lah ban leit shaw ïa ki(Nongialam HNLC) ruh da ka jingïarap u Bah Thyrson Lymba.
Haba kylli, u Bah Sadon ula ong “Nga la ithuh la 24 snem eiei ia u Bah Thyrson bad ngi la ïatreilang ha ka seng hynrei ngam pat ju ïohi ba un leh ia kano kano ka kam ka bym lah ban pdiang” ula bynrap.
Hynrei ula ong, ka seng kan hap ban ap bad kam lah ban pynthut ïa ka jingtohkit ki Pulit ne ka jingtian bishar jong ka ïing bishar.
“Ynda ka kam kala poi sha ïing bishar bad lah chargesheet, ngi ruh ngin ym shong sngap jar ïa kane ka kam namar ki Pulit ki ju myllien ban pynlong langknia ïa ki nongïalam Sengbhalang haba don kano kano ka jingjia” ong u Bah Sadon.
“Ha bun ki khep kiba bun ki dkhot jong ngi kila shah khot hajir ha ki Pulit hynrei ngim ju pynpaw paidbah halor kine ki juh ki jingsuba bad wat ka kali jong nga ruh kala shah khynra ha ki Pulit ka Ri-Bhoi khlem kano kano ka daw” ula bynrap.
