Shillong, Lber 11:Kumba la leh naduh ki por ba kane ka EC kaba thymmai ka la shimti ïa u lakam synshar ka KHADC bad da ka jingthmu ban pynkhlaiñ ïa ka jingïoh lum pisa ka KHADC bad kumjuh ruh ban khanglad ïa ka jingïoh khaïi laitluid ba beaiñ jong ki bar jylla hapoh u pud u sam ka KHADC, u CEM ka KHADC u Bah Pynïaid Sing Syiem u la ong ba kumba la leh ha ki por ba la leit noh, kumjuh mynta tang shu lah kut ka Ïingdorbar Thaw Aiñ jong ka Mang tyngka ka KHADC ka Council kan ïaibteng biang ban leit khynra ïa ki laisen khaïi ha baroh ki jaka ka KHADC.
“Watla ka long kaba eh ban leit khynra laisen khaïi khlem ka jingïatreilang bad ki nongïalam shnong namar ka jingduna ki pulit Enforcement, hynrei ka Council lyngba ka Trade department kan bteng biang ïa ka jingkhynra laisen khaïi,” ong u CEM.
Haba ïadei pat bad ka jingïoh jingtip ba ki don ki bar jylla ne kiba lah ruh ban dei ki bar ri na Bangladesh kiba la seng da ka ïew kaba thymmai ha Ichamati u CEM u la ong, “Ïa kane ngin ïatreilang bad ka Elaka Mawlong ba la don ki briew ba nabar jylla ne bar ri kiba la sdang ban seng ïew sha kawei pat ka jaka na Ichamati ka Council kan ym pyntip lano ngin leit hynrei kan ym slem shuh ba kan shu leit khang beit ïa katei ka ïew namar ki la seng ne leh kam khaïi khlem ka jingtip ka shnong, ka KHADC kumta ka la long beaiñ kane ka jingleh jong ki.”
