T. 3 lak khur ka Mawlai SC kum ka lahduh jong ka OC Blue Shillong Premier League

Shillong, Nailur 30 : Ka Mawlai SC ha ka sngi Thohdieng ka la ïoh ban bat ha kti ïa ka trophy nam lahduh jong ka OC Blue Shillong Premier Legague 2021-22 ha ryngkat ruh bad ka nam jop ba ka la pynliem ïa ka Langsning FC ha ka jingïalehkai kaba khadduh jong katei ka lympung ïalehkai phutbol ha hehduh hapoh ka jylla ha ka sngi Thohdieng ha madan Third Ground, Polo, Shillong.
Ka Mawlai SC ka la pynliem da 2-1 kol ïa ka Langsning FC ha katei ka jingïalehkai kaba 56 bad kaba khadduh jong ka OC Blue Shillong Premier League (SPL) 2021-22.
Ha kane ka sngi kut jong katei ka lympung u Bah Banteidor Lyngdoh uba dei ruh u Myntri jong ka tnad ki kam ïalehkai jong ka jylla u la sakhi lang kum u kongsan bad aiti ruh ïa ka trophy nam lahduh sha ka Mawlai SC kaba dei ka lahduh, kaba la ïoh rah nam lahduh lypa naduh ka 9 tarik Nailur 2022. U Myntri ha kane ka sngi u la pynbna ruh ba ïa ka samoi ïalehkai OC Blue SPL 2021-22 kaba la sdang ha ka 15 tarik Jylliew la pynkut noh.
Ka Mawlai SC kaba long ka lahduh ka la khur ruh ïa ka cheque ba 3 lak tyngka da ki nongmihkhmat jong ka OC Blue kaba dei ka nongbei tyngka ïa katei ka lympung, u Pijush Dey bad Shri Lakshya Jit Borah. Ha kane ka sngi la ïadonlang ruh u President jong ka Shillong Sports Association (SSA) u Bah Eugeneson Lyngdoh uba dei ruh u MLA, ki nongkitkam bad dkhot jong ka SSA, ki nongpynïaid jong ka tournament bad kiwei kiwei ki riew rangbah.
Ka Langsning FC kaba la mad nam rem ka la pynkut ha ka kyrdan kaba lai katba ka Rangdajied United FC ka wan ha ka kyrdan kaba ar bad ka ïoh khur ïa ka song pisa ba 1 lak tyngka.
Haba phai sha ka jingïalehkai, ka Mawlai ka la ñion naduh kaba sdang ha ka kylla step bad da katei ka rukom ïalehkai ha ka minit ba 32 ka la ïoh ban plie pyrda lyngba u Donlad Diengdoh uba la ïoh ban thep kol kaba la wan lyngba ka jingshut free-kick u kapten jong ka u Brolington Warlarpih. Hashwa ban kut ka kylla step, u Fullmoon Mukhim (45’+1) u la thep ïa ka kol kaba ar na bynta ka Mawlai ha kaba ki paidbah nongkyrshan kiba la poi da ki spah nugt ki la shad kmen bad kynhoi risa watla hapdeng ka jingpynthut u slap ha ka jingïalehkai jong ka kylla step.
Haba wanphai sha ka kylla miet, ka Langsning ka la ïakhun tyngeh ban pynphai kol bad dei ha ka minit ba 74 u Kitboklang Pale u la ïoh ban thep ïa ka shi kol da kaba sangah da ka khlieh. Hynrei watla ki la ïakhun tyngeh ban pynïakhaid pynban ki khlem lah ban thep kol ha kaba ka Mawlai SC ka la pynliem synon da 2-1 kol.
Ha katei ka lympung ïalehkai la ïoh ban thep 166 kol lyngba ki 75 ngut ki rangïalehkai.