Nongpoh, Naitung 31: Ha kawei ka jingjia, u wei u rangbah briew ba la tip kyrteng kum u Rafiqul Islam u la khlad noh hadien ka jingsuba shah shoh dusmon bad shah pom da u sdie na ki bynta jong ka khlieh bad kane ka jingjia la suba ruh ba la jia ha ka shnong Pyllun Umroi, Ri Bhoi District.
Katkum ka jingtip ba la iohlum na ki pulit, la iathuh, ba ki pulit ka Ri Bhoi District ki la ioh jingtip ha ka por 8 baje duna eiei janmiet halor ka jingjia shah pynmynsaw u wei u rangbah briew u la mynsaw jur hadien ka jingshah shoh dusmon bad la pynkit sha ka Holy Cross Hospital ha Umsaw hynrei u la khlad noh hashwa ban poi ha ka jaka sumar.
La ioh jingtip ruh na ki pulit, ba ha ka jingtohkit, la shem ba u tei u briew ba la khlad noh u shong u sah lang bad ua wei pat u paralok jong u, u ba dang jah rngai mynta bad ki pulit ki dang thwet ia u tei u briew.
Ha ka jingtohkit ki pulit, ki la lap ruh ia u wei u sdie na ka iingsah jong u ne u rangbah ba la shah pyniap bad ka jingtohkit ka dang iaid shakhmat ban iohkem pat ia u briew ba la suba donkti ha katei ka kam pyniap briew.
