Shillong, Naitung 31 : Ki la don palat 1046 ngut ki nos kiba la dep rejistar ïalade na ka bynta ka Overseas Job Fair kaban long ha Shillong ha ka 04tarik Nailar.
Haba pynbna ïa kane, ka Myntri ka tnad ka Koit ka Khiah ka Jylla, Kong Ampareen Lyngdoh ka la ong, “Ngi la rai ban don da ka rynsan tyrwa kam na bynta ki nos kiba khlem pat ïoh kam ha ka jylla bad kiba kwah ban leit trei shabar ri.”
Ka la ïathuh ruh ba ki don katto katne tylli ki ri kiba la pynpaw ba ki kwah ban thung kam ïa ki nos na Meghalaya, kine ki kynthup naduh ka Japan, United Kingdom, UAE, Germany bad Australia. Katkum ka jingïathuh jong ka, kadon ruh kawei ka kompeni na Singaore kaba la pynpaw ïa ka jingkwah ban shim bynta lang ha katei ka rynsan tyrwa kam.
“Kane kadei ka sien kaba nyngkong eh kaba ngi kwah ban leh namar ngi ïoh jingtip baki don bun bha ki nos kiba la dep ka jingpule hynrei ki bym pat ïoh kam ha ka jylla,” la bynrap biang ka Myntri.
La ïathuh ruh ba kitei ki nos kin ïoh ka jinghikai pyntbit kaba 6bnai kaba kynthup naduh ka ktien ka thylliej ha kaba ka jinghikai kan long ha ki nongbah kiba heh ha ka Ri kum ha Delhi, Mumbai bad Bangalore.
Haba kren pat halor ka kamram jong ka sorkar halor kane, ka Myntri ka la pyntip ba ym tang ba ka wanrah ïa ki briew sha katei ka rynsan tyrwa kam hynrei ka kloi ruh ban pynlut haduh 50hajar tyngka na bynta iwei i nos ha ka por ba ki don ha ka jingshah pyntbit.
La pyntip ruh ba ka jingsiew ba kitei ki nos kin ïoh ban phah sha iing kan long beit la kumno kumno 1.5lak haduh 2 lak shi bnai nalor ba ki la dep ban siew ïa ka bai sah, bad ka jingpynlut ha kaba shah hikai.
