Suba ka HANM, HYC ba lah ban don ka jingkhaïi tuh ïa ki marbam sha Bangladesh
Mawkyrwat, Rymphang 18: Hadien ka jingmih ki kynrum kynram ha ki thaiñ Border jong ka Ranikor ha kine ki khyndiat sngi bad ba la mih ruh ha ki lad pathai khubor ba ka la don ka jingshah bat ki kali kit marbam ha ki BSF, na ka liang ka Hynñiewtrep Achick’s National Movement (HANM) bad ka Hynñiewtrep Youth’s Council (HYC) jong ka South West Khasi Hills District ki la hiar ban jurip sha katei ka thaiñ ban lap ïa ka jingshisha.
Hadien ka jingjurip, ki nongïalam jong ki ar seng ka HANM bad HYC, South West Khasi Hills District haba ai jingkren ha ki lad pathai khubor ha ophis treikam jong ka HANM ki la ai jingïaroh ïa ka tnad Border Security Force (BSF) ïa ka jingtalasi ïa kine ki kali kiba la hiar palat put kaba la kot da ki spah tylli ki kali ha ka shi sngi ban kit ïa ki marbam, haduh ba la don ka jingsuba ba lah ban don ki kam khaïi tuh shabar ri ïa kine ki marbam.
Ki ar seng ki la pynrem pat ïa ki BSF kiba la wan ban bat kali talasi hapoh shnong briew kaba la pynlong ïa ka jingdheng kali kaba shyrkhei bad ka la buh jingtieng ruh ïa ki paidbah nongleit nongwan ki kynthei ki khynnah. Halor kane ka bynta ka HANM ka la ïa kren ïa u Director General jong ka Border Security Force (BSF), Mawpat Headquarter, Shillong ba dei ban pynkynriah noh ïa ki BSF kiba don ha katei ka jaka khnang ba kan long ka jingshongsuk shongsaiñ ïa ki paidbah, halor kane na ka liang jong u DG ula kular ba un sa weng noh shen ïa ki na kane ka jaka.
Ka HYC bad HANM ki la buh jingkylli ruh ïa ka sorkar ba shaei kine ki marbam ki leit? kaba haduh da ki spah kali ha ka shi sngi ki hiar sah ki thaiñ Ranikor, hato ka District Administration ka don jingtip ne em ïa kane ka kam? bad ka tnad police kaba don ha Ranikor balei kam trei kam haduh ban da shimti da ki BSF ban bat ïa ki kali ban talasi ïa kine ki kali.
Ha kawei pat ka khubor, ha kaba ïa dei kum kine ki jait jingjia, naba jur palat ki nongkhaïi tuh u kwai supari, shini, ki masi, bad u piat ha ki thaiñ Ranikor, naba kiew dor palat ka doh masi, shini, u piat bad bad ka sniew palat ki surok na Mawkyrwat bad na Mawsynram, ha ka miet 27/1/2024 ha ka por 7 baje ha jingkieng Ranikor bad ha Shnong Pamdaba ki la bat ïa ar tylli ki kali ba kit u kwai pyut ne jleb kwai bad shna supari ba wan lyngba na Bangladesh ha Khonjoy bad ki ïaid lyngba na Nonghyllam Police Station, Ranikor Police Staion bad Mawkyrwat Police Station.
Kine ki samla ka thaiñ Ranikor ki la ïathuh ruh, ba haba ki la kylli na ki nongñiah ki la batai ba ki pulit ki shu peit number plate bad pyllait naduh Nonghyllam PS haduh Nongstoiñ.