Jowai, Rymphang, 18: Ka Seng Federation of Khasi Jaiñtia Garo People (FKJGP) East Jaiñtia Hills District Khliehriat mynta ka sngew dei ban ai ka jingïaroh ïa ki ar tylli ki Shnong kata ia ka Shnong Umrasong bad ka Shnong Nongsning, East Jaintia Hills kiba la mih shakhmat ban pynpaw ïa ka jingeh ba ki ïa kynduh naduh ba don ki Kharkhana Coke hapoh ki Shnong.
Kum ka Seng ngi sngew ba ka sien jam ba la shim da kitei ki ar tylli ki Shnong ka long kaba dei eh namar kaba dei namar kitei ki Coke ki pynsniew ia ki tyllong umbam um dih jong kitei ki ar tylli ki Shnong ka ban ktah ïa ka koit ka khiah ki nongshong shnong bad ka jingpynmih ïa ka lyer kaba jakhlia kaba lah ban wanrah ki jingpang ba bunjait na ka ring bad pynhiar mynsiem jong ki paidbah.
Kum ka Seng ka ong ba ka sngewkhia na ka por sha ka por ïa ka rukom long ka mei mariang hapoh East Jaiñtia Hills namar la bun sa tang ki lad pynjot ban ïa ki lad pynbha bad niar eh ban shem ban don ki Dorbar Shnong ban sngewkhia halor kane ong ki nongïalam ka Seng.
Lah ban kdew hangne ba hadien ka jingujor kitei ki ar tylli ki Shnong sha u Member Secretary ka Meghalaya State Pollution Control Board (MSPCB) Shillong mynhynnin ka sngi la wan jurip da katei ka tnad ïa ka rukom long ka umbam umdih ha kitei ki Shnong bad ka Seng ka ai ka jingkyrshan ïa kitei ki ar tylli ki Shnong ban dawa ban pynduh ïa ka jingïoh Consent to Establish (CTE) namar ka jingnang pynbun shuh ïa ki atoskhana ha ki Coke Plant bapher bapher ka long ka jingshun ïa ka mei mariang bad kyrpang ïa ka koit ka khiah u paidbah jong ka thain ong ka khubor ba la phah da u President ka Seng Bah D. H. Sumer bad u General Secretary Bah E. Sutnga.
