Shillong Rymphang 18: Ka tamasa ‘Escape To Nongjrong’ harud ka Wah Umngot ha Mawkynrew C&RD Block kaba la sdang ha ka 16 tarik u Rymphang, 2024 ka la kut noh ha ka janmiet 17 tarik u Rymphang, 2024 da ki jingtem bad jingrwai na ki nongrwai ba pawnam ka Ri Lum Khasi Jaiñtia ba kynthup ïa ka samla Bahun Marwein, Gracyl Ropmay, Banjop Nongbri, Wanjop Sohkhlet ryngkat ka kynhun Mar Local nalor kiwei ha ryngkat ka jingwan sakhi da ki phew hajar ngut ki paidbah ym tang na katei ka thaiñ hynrei na kylleng kylleng kynthup kiba wan jngohkai na kiwei ki jylla bad na shabar Ri India kumjuh.
Ha shwa ki jingtem jingrwai kiba la pynshongshit ïa ki paidbah, ha kane ka janmiet ka la don ruh ka jingïakob pyni dur bhabriew ryngkat ka riam ka beit ba la ïa shim bynta da ki samla kynthei bad shynrang lem ki longkmie na ki shnong bapher bapher kiba hap ha ka Mawkynrew Constituency. Ïa ka nam lahduh na ka liang ki longkmie lane Mrs Mawkynrew 2024 la rah da ka Kong Kyntulang Rynjah na Synñiasya, ïa ka kyrdan ba ar pat da ka Kong Shembhalin Mynsong bad ïa ka kyrdan ba lai pat da ka Kong Ailibon Khriam kiba dei na Jongksha.
ïa ka nam lahduh na ki samla shynrang lane Mr Mawkynrew 2024 pat la rah da u samla Banpyndaplang Ryndong na Thangsning, ïa ka kyrdan ba ar da u samla Willborn Mynsong na Mawleiñ bad kaba lai pat la rah da u samla Kyrshanborlang Kharumnuid na Rapleng. Na ka liang ki samla kynthei pat lane Miss Mawkynrew 2024 ïa ka nam lahduh la rah da ka samla Dabisharbha Mylliemngap bad ïa ka kyrdan ba ar pat da ka samla Deibyntalang Mylliemngap kiba dei na Laitkyrhong katba ïa ka kyrdan ba lai la rah da ka samla Jesica Nongpluh na Kharang.
Ki khusnam pisa na ka bynta kine ki kyrdan jingïakob ki long 25000 tyngka ïa kiba wan ba nyngkong, 15000 tyngka ïa kiba wan ha ka kyrdan ba ar bad 10000 tyngka ïa kiba wan ba lai. Ha shwa ki jingtem jingrwai ka la don ruh ka prokram jingshad da ki longkmie ka thaiñ Mawkynrew ba la lam khmat da ka Dr Amanda A Pakyntein kaba dei ruh ka kurim u Bah Banteidor Lyngdoh, MLA ka Mawkynrew.
ïa kane ka tamasa la khot pynlong da ka Mawkynrew Tourism Sociable Society (MTSS ) ha ka jingïalam u Bah Banteidor kum u President, u Bah Olet Kharsahnoh kum u Secretary nalor kiwei pat ha ryngkat ka jingïatreilang ka Meghalaya Tourism bad bor pynïaid shnong ka Nongjrong ha ka jingïalam u Bah Pynshai Synjri uba dei u Sordar kum shi bynta ban kyntiew ïa ka kam jngohkai pyrthei ha ki thaiñ ka Mawkynrew Constituency.
Kum ban shu kdew ba ka shnong Nongjrong ka dei ka shnong kaba paw bha ha ka jingkhring ïa ki nongshangkai pyrthei na ka jingitynnad ki kjat sngi ha ka por mih sngi mynstep halor u lyoh ha ki them ka Wah Umngot kaba ker pyllun ïa katei ka shnong.
Kane ka shnong ka don ha ka ïa ka mariang kaba ithiang, ki jait jingrep kum u sohñiamtra, ki jingtem bad ki jingrwai tynrai bad ha ryngkat ka riti dustur bad ka rukom im. Nalor kiwei pat ki mar rep, ki sohñiamtra ha kane ka shnong ki dei kiba lah ban ih bad dang lah ban ïoh haduh ki taïew ba khatduh jong u bnai Lber bad taïew sdang jong u bnai Iaiong man la u snem.
Ha kine ki ar sngi jong kane ka tamasa, ki nongshong shnong kumjuh na ki Self Help Group bapher bapher ka thaiñ kumjuh kiba na bar ka Constituency ki l wanrah la ki mar jingdie jong ki kynthup u sohñiamtra, ki jingbam tynrai, ki mar rep, ki um soh, ka wine bad kiwei pat ban ïa die ïa thied ha kane ka tamasa nalor ki jingbam khutia mutia.
Ka Society ha kine ki ar sngi nalor ki rynsan ïakob pyni dur bhabriew bad ki jingtem jingrwai ka la pynkhreh ruh ïa ki jaka sah miet ne camping, ka jingïaking lieng kynda ne kayaking, ka jingpynher parachute ne paragliding, ki jinghiar tyllai na shiliang sha shiliang ka Wah Umngot nalor kiwei pat ki prokram.
Ha ka sngi sdang jong kane tamasa ha ka por janmiet ki la don ruh ki jingrwai jingtem na ka kynhun Snow White bad kiwei ki kynhun tem bad kynhun rwai na ka thaiñ.
U Bah Banteidor haba kren ha ka jingïalang plie ïa kane ka tamasa kum u Kongsan ha ka 16 tarik u Rymphang, 2024 u la ong ba ka jingthmu kane ka tamasa ka long ba ki nongshong shnong kin shim ïa ki lynti ban kyntiew ïa ka ïoh ka kot na ka kam jngohkai pyrthei bad ïa ka Society ruh la seng ha kane ka nongrim.
“Naduh u 2018 ngi la pyrshang ha ryngkat i Bah LT Tariang, BDO ka Mawkynrew ha katei ka por ban kyntiew ïa ka kam jngohkai ha kane ka shnong bad suki suki mynta na ka jingsdang kaba rit ka la nang pynïoh lad ïa ki nongshong shnong ban ïoh kamai da kaba buh bad don mynta haduh 7 tylli ki ïing basa na ka bynta ki nongwan jngohkai”, la ong u Bah Banteidor.
Da kaba pynpaw ba ka Mawkynrew ka don bun tylli ki jaka jngohkai ba itynnad nalor ka Laitlum, Syntung, ka Kshaid Pdem ha Khlieh- A- Sem, kaba ki briew ki la hiar na ka por sha ka por ban leit jngohkai, u MLA u la ong ba ka bor ka jingïatreilang kan lam sha ka jingjop ha kino kino ki kam kiba ïa thmu bad kane ka sien ba mynta ka dei kaba nyngkong ïa ka thaiñ.
