SHILLONG, Nailar 30: Ki jingïalehkai phutbol ka lympung Third Division 2024 jong ka Shillong Sports Association kiba la long ha ka sngi Thohdieng (30.08.2024) ha SSA Stadium, Polo, la sakhi ïa ar tylli ki kynhun ba kynthup ïa ka Tynring SC bad ka Kharang SC kiba la khur ïa ka namjop ha ki jingïakhun.
Ha ka jingïakhun kaba nyngkong, ka Tynring SC ka la pynliem noh ïa ka Mawshuhbuit da 2 kol.Baroh ar kol la pynkhih da u Commanding Swer (35 & 75 minit).
Nangta ha ka jingïalehkai kaba bud, ka Kharang SC ka la pynliem suk haduh 5-1 kol ïa ka Lapalang SC ban khur shalade ïa ki lai point. U Balajied Lyngwa u la ïoh ban pynkhihjar ar kol na bynta ka kynhun (10 & 47 minit), u Freelyson Tariang (68min), u Labanstar Tara (72min) bad u Firstbornjohn Marwein (86 min) ki la ïoh ban thep mar kawei. Katba ïa ka Lapalang SC la thep da u Lenginthang Changloi (90+2min) shuwa ban kut ka por.
Mynta ka sngi (31.08.2024) kin don biang ar tylli ki jingïalehkai, kaba nyngkong ha ka por 12:45 baje mynsngi hapdeng ka Pomlakrai SC bad ka Nongumlong SC, nangta ka jingïakhun kaba ar ha ka por 3:45 baje nohphaisngi hapdeng ka Mawryngkneng SC bad ka Nongmensong SC. Baroh ar tylli ki jingïalehkai yn pynlong ha madan SSA Stadium, Polo.
