Shillong, Naitung 02: Ka Sanmer SC ka la bteng ïa ka jingjop ba paka Group D jong ka lympung Third Division Football League 2026 ba la pynïaid da ka Shillong Sports Association, da kaba pynliem noh da 1-0 ïa ka Lumparing SC hynne ka sngi Palei.
Da kane ka jingjop ka Sanmer ka la lah ban pynkut ïa ka group stage da kaba khur 9 point pura na ki lai tylli ki jingïalehkai.
Ka Sanmer kaba ladep ban pynthikna ïa ka jaka ha ka Quarter final, ka la thep ïa katei ka shi kol lyngba u Shanbor Thongni (7’min) tang hadien katto katne ba la sdang ïa ka kylla step.
Nalor ka Sanmer, ka Lapalang SC ka la pynskhem ïa la ka jong ka jaka ha ka Quarter final da kaba jop 2-1 ïa ka Umpling SC.
Ka Lapalang ka la thep ïa kine ki ar kol lyngba u Sending Roi Rngaid (10’) bad u Leginthang Changloi (34’), katba ka shi kol jong ka Umpling kadei kaba la kum thep hi da u rangïalehkai ka Lapalang, u Aibok Brandon Myrthong ha ka minit kaba 27 (Own goal).
Hadien ba ka jingpyndep ïa ka group stage ha ka Third Division mynta ka SSA kan phaikhmat sha ka jingïakhun Pre- Quarter jong ka U-20 4th Division Football league 2026.
Ha ka por 1 baje mynsngi ka Iatylli SC kan aireng pyrshah ïa ka Them Rangshken SC; bud sa ka jingïakhun ha ka por 4 baje janmiet hapdeng ka New Challenger FC pyrshah ïa ka Golflink SC. Baroh ar kin long ha madan First Ground-SSA Stadium.
