SHILLONG, Naitung 02: Ka PFR Football Academy ka dap da ka jingsngew sarong haduh katta katta hadien ba u Damenbandon Mawkhroh u la shah khot ban shim bynta sha ka jingpyrshang ba khatduh (Final Trial) jong ka Under-15 AIFF FIFA Talent Academy.
ïa kane ka jingpyrshang ba khatduh la buh ban sdang ha ka 11 tarik Naitung 2026 ha Hyderabad.
Kane ka dei ka kyrdan ba khatduh ban shah jied (Final Selection Stage) na ka bynta kane ka prokram jied khynnah ïalehkai ba donsap ba pawnam tam ha India, ba la pynïaid da ka All India Football Federation ha ka jingïatreilang bad ka FIFA.
U Damenbandon udei u khynnah ïalehkai uba ka PFR ka la pynmih. U la don ryngkat bad kane ka shlem ai jinghikai naduh ba u dang don 7 snem ka rta, bad la saiñdur bad pynroi ïa ka sap hapoh ka jinghikai jong i Coach Nylla Meri Wahlang bad u Coach Jewelson Lyngdoh.
Naduh ka kyrdan U-7 grassroots haduh ka jingkhang jong ka kynhun U-15 jong ka ri India kane ka dei ka lynti ïaid jong ka PFR. Kumta na ka liang jong ka jylla baroh kawei ka kitbok kitrwiang ïa u Damenbandon bad ban wanrah nam ban pynlong ïa ka Meghalaya kaba sngew sarong.
