Kynshi, Rymphang 16: U Bah Ropbertjune Kharjahrin, President ka HYC, Central Body, u la pynpaw ka jingsngewkhia kaba jur halor ka jyrsieh kaba don ha ka tnad Pulit kat haduh ba ka jingim jong u heh Pulit Bah GK Ïangrai ka don ha ka jingma.
Ym tang katta kaba sngew shyrkhei eh ka long ba wat ki bahaïing hasem jong u ruh ki la ngat lang ha ka jingshah pynher mynsiem. “Ka long kaei kaei kaba sngewkhia ba kane ka tnad treikam kaba la buh ban ai jingshngaiñ ïa ki paidbah mynta ka kylla long pynban ka tnad kaba pynhiar kput para ma ki bad kaba wanrah jingma pynban para ma ki,” la ong u Bah Kharjahrin.
U la ong ba kaei ka ban jia ïa ki paidbah lada kata ka tnad kaba dei ban ai jingïada bad jingshngaiñ ïa ki paidbah ka don hapdeng ka kynrum kynram bad ka jingbym ïashngaiñ para ma ki.
