Sngewkhia u Bah Primson ba sniew palat ka surok ba pynïasoh sha ka Shnong Mawpyrhut

Nongpoh, Risaw 02: Kum uwei na u samla ka dong Ri Bhoi, u Samla Rangbah ka Ri Bhoi, u Bah Primson Makdoh u la pynpaw ka jingsngewkhia kaba jur halor ka jinglap ba kawei ka shnong ka dang shah iehnoh beiñ ha ka sorkar jylla khlem pat da ioh ïa ka surok kaba bit ba biang ban pynsuk ïa ki paidbah ha ka leit ka wan bad ka kit ka bah.
U samla Primson Makdoh u la pynpaw ka jingsngewkhia ka dei hadien ba u la leit jngoh ïa katei ka shnong bad da lade hi u la lap ba kawei ka surok shnong ka la shah iehnoh beiñ khlem da don kiba peit ba khmih bad ka jingsniew kane ka surok ka la pynsyrtok shisha ïa ki paidbah nongleit nongwan katei ka shnong.
Kane ka surok ka dei ka surok ban pynïasoh sha ka shnong Mawpyrhut kaba don ka jingjngai tang kumba 2 km ei ei ka jingjngai na ka surokbah National Highway ha Umran ban poi sha ka shnong Mawpyrhut.
Haba pynpaw halor kane ka jingsyrtok ki paidbah ka shnong Mawpyrhut, u Samla Primson Makdoh u la ong ba kum uwei na u samla ka dong Ri Bhoi, u dap da ka jingsngewkhia ban lap ba ki paidbah ki shah iehnoh beiñ ha ka sorkar ba kane ka jingsniew ka surok ka la ktah shisha ïa ki paidbah ha ka leit ka wan bad ka kit ka bah.
“Kumba ju ong ba ka surok ka long u Budlum ka ioh ka kot bad ha kane ka shnong kane ka jingkren kam ïahap satia” ong u Samla Primson Makroh bad bynrap ruh kumno ki paidbah kin kiew ha ka liang ka io ka kot lada ïa ka surok kaba ki pyndonkam ka long ka surok kaba sniew bad kaba jot rathai kaba la pynjynjar ïa ki paidbah ha ka leit ka wan bad ka kit ka bah” u la bynrap.
Namarkata, kum uwei u riew rangbah lane u samla ka dong Ri Bhoi, u la buh ka jingkyrpad sha ka sorkar jylla lyngba ka tnad PWD ba kana phai khmat lem ruh sha katei ka shnong ba kan ioh ïa ka surok kaba bit ba biang bad lada ka surok kaba long kaba bit ba biang khlem pep ki paidbah nongshong shnong ruh kin dang kiew ha baroh ki liang, u la bynrap shuh shuh.
Halor kane ka jingsniew ka surok, wat ki paidbah nongshong shnong ruh ki la pynpaw ka jingsngewkhia kaba jur, namar kum ki nongshong shnong kiba shong basah ha katei ka shnong ki da syrtok shisha ha ka leit ka wan bad ka kit ka bah ba ki phai khmat ruh sha ka sorkar ban thaw ïa ki lad ki lynti na ka bynta ban pynioh ïa ka surok kaba bit ba biang ban suk ka leit ka wan bad ka kit ka bah jong ki nongshong shnong katei ka Shnong.