Nongpoh, Ïaiong 30: Hadien ka jingsaphriang jong kawei ka video kaba la pynkyndit bad pynpar ñiangkhriat ïa kiba bun, hadien ba kawei ka longkmie ka la btep im ïa la i jong i khun ba dang shu kha ha khyndew hadien kawei ka skul ha Ri-Bhoi District, ki nongïalam ka Women Organisation of Ri-Bhoi District mynta ka sngi kila leit jngoh ïaka kmie kaba thiah ha jaka sumar.
Kumba la ïoh lum jingtip, kane ka jingjia ka la jia ha ka 27 tarik u bnai Ïaïong ha kawei ka shnong kaba hap hapoh ka thaiñ Mawhati, Ri-Bhoi District. Ki nonghikai bad ki khynnah skul ki la iohsngew ïa ka sur jinglynniar jong i khyllung haki bynta ba shadien ka skul.
Uwei na ki khynnah skul, kumba la sakhi ruh ha ka video kaba la saphriang, u la leit mar mar ban tih bad kraid ïa ka khyndew bad u la lap ïa i khyllung ba dang shu kha I ba dang im, ba la btep hapoh ka khyndew.
Hadien katei ka jingjia, ki bor pynïaid skul ki la pyntip noh mar mar sha ki bor shnong bad la pynkit noh ïa u khyllung sha ka jaka ai jingsumar ban ioh jingïarap bad kumba long haduh mynta itei I khyllung ila sdang ban iohbor bad don hapdeng ka jingsumar.
Halor kane ka jingjia naka liang ka Women Organisation of Ri-Bhoi District hapoh ka jingïalam ka Kong Mirajune Myrsing kum ka President kala pynpaw ka jingsngewsih bad sngewkhia halor katei ka jingjia ha ka jylla jong ngi namar kane ka wanrah ïaka jingjah burom ïaka iing ka sem bad ka shnong ka thaw bad wat u Blei ruh u sngewsih ïa kane ka jingjia.
Kum ka longkmie kala kyntu ruh ïaki khun samla ba kin husiar ha shuwa ban shim ïa kano kano ka rai ha kaba ïadei bad ka kam shongkha shongman khnang ba kum kine ki jingjia kin nym jia shuh nangne shakhmat.
