Shillong, Ïaiong 30 : Da ka thong ban pynstet ïa ka jingtreikam ki projek jong ka Jal Jeevan Mission (JJM) na ka liang u Myntri ka tnad PHE u Marcuise N Marak ha ka sngi Balang u la bthah ïa baroh ki Deputy Commissioner ba kin pynlong man u bnai ïa ki jingïalang buddien bad ki District Water and Sanitation Committee (DWSC) bad ruh ban phah (upload) ïa ki rai ha ka portal IMIS jong ka sorkar pdeng.
Haba kren bad ki lad pathai khubor hadien ka jingïalang, u Myntri u la ong ba haduh mynta ka jingthaw ïa ki ID na ka bynta ki projek JJM kumba la bthah da ka sorkar pdeng mynta ka la ïaid shakhmat.
Shuh shuh u ong ruh ba ki DC kum ki Chairman jong ki DWSC kin long ki kongsan ban peitngor bad buddien ïa ka rukom treikam kaba paka ha ki shnong.
“Kin hap ban buddien bad lum ka jingïalang bad ïa ki rai jingïalang ki hap ban phah ne upload ha ka IMIS khnang ba ka sorkar pdeng kan ïoh ban peit bad bishar hangto hi bad ruh ban buddien ïa ka kam,” u la ong.
Katkum ka jingong jong u, ki DC ryngkat ki gramsevak, ki don ka bynta kaba khraw ban peit ïa ka jingïaid ki kam ha ki shnong khamtam naba ki village water and sanitation committee ki peit ïa kine ki projek. U ong ruh ba lada ma ki hi kim peit ïa kine ki projek kumno yn lah ban pynkohnguh ïa ka jinglong trai ïa ki projek bad ban lah ban pyntreikam na ka bynta ka bit ka biang jong ki hi.
Ha kajuh ka ka por u la ong ba ka PHE tang marwei hi kam lah ban pynkohnguh ïa ki paidbah hynrei lada ki DC bad BDO ki don bynta lang ka mut baroh kin don bynta bad kane hi kan pynsuk ïa ka kam.
“Kumta, ngi kyrpad ïa baroh kiba don bynta lang ba kin ai ka jingïatrei lang bad ka sorkar khnang ban pynlong kam pura ïa kane ka projek,” ong u Myntri.
