Shillong,Jymmang 23 :Ka Synjuk ki Nongsynshar Shnong ka Bri u Hynñiewtrep (SNSBH) kaba long ka lympung jong ki Nongsynshar Shnong na baroh kawei ka Bri u Hynñiewtrep ïa kaba la kha da ka mon ki paradoh parasnam ha ka Dorbar Bah ka Ri kaba la long ha ka 30 Tarik u Jymmang 2015 ha Madan Polo; ha kane ka kynti ka Synjuk ka dap da ka jingsngewsih kaba khraw ryngkat ka jinglynga mynsiem ban ïohi ïa ka jinglong jingman jong ki jingtei ba la bei Pisa da ka Sorkar Jylla bad ka Sorkar kmie kiba la pyntreikam da kane ka sorkar Meghalaya Democratic Alliance (MDA) ki la pynlehraiñ shisha ïa ka jylla.
“Lyngba ki lad pathai khubor ngi la ïohi shibun tylli ki jingtrei kiba ka Sorkar MDA ka la pyntrei kiba kum ki riewpaidbah ngi la sngewkmen namar la tei ïa ki da ka jingthmu ban myntoi u Paidbah bad ban ïoh burom ka Jylla.Hynrei kine ki jingtrei ha ka jaka ba kin long kum ki mawlynnai kiba pynphuh pynphieng ïa ka pansngiat bad ki ban wanrah burom ïa ka Jylla ryngkat ban pynsuk ïa u babun balang; mynta ki la kylla long ki daw jong ka jingjah burom ïa ki nongshong Shnong jong ka Jylla baroh kawei bad ngi da sngewlehraiñ shikatdei eh haba jia kumne” ong ka kyrwoh ba la phah da u General Secretary ka SNSBH u bah R.L Blah.
Nalor kane ka kyrwoh ka ong “Kum ban shu ong noh; ka jingjulor jong ka jingkieng Dwar Ksuid ne ka jingjulor ha ISBT Mawiong ne ka jingjulor jong ki bynta jong ka surok basyndah bad ka jingkieng Mawlai Bye pass (ka bymbiang wat tang ka Nala um) bad mynta pat ka jingtwa jong ka Dome ha ka ïing Dorbar Thawaiñ kaba dang trei ki long ki Dak ba paw shynna ba ym dei tang ki Contractor ki bym tbit satia ban pyntrei ïa ki kam hynrei wat ki Engineer ruh imat kim kitkhia ïa la ki kamram ne ki phai da ka ingdong haba ki ïohi ïa ki jingduna bad tang ka jingïatip lem jong ki ka ban bishar ïa ki ka jingkheiñ sting jong ki”.
Lada kiei kiei ki long kumne kumba long mynta; ha kaba ïa ki kam baroh la pyntrei torti da ki Contractor jong ngi na ka bynta ka bit ka biang jong ngi da ka Pisa jong ngi, shaei keiñ ka lawei jong ka Jylla khamtam leilei ka lawei jong ka imlang sahlang ka Bri u Hynnñiewtrep?
“Hato dang donkam seh mo da u Dkhar u Lyngkien ban wan ïuhroit ïa ngi haba da ki briew lajong ki long ki daw bah jong ka jot ka pra ne ka kheiñ dew thala ïa la ka kamram ne ka bam sap bam pong” ong ka kyrwoh.
Hooid ïa ka Assembly building la pyntrei da ka Company ba long trai da ka Sorkar Uttar Pradesh. Hato ka biang ba ki bor badei khmih (kumba la ïohi ha ki lad pathai khubor) kin mih pyrthei mynta ynda la twa ban ong ba ka daw jong ka jingtwa jong ka Dome ka long namar bym biang ka design ? Hato ka lah ban long ba ki kot ki sla ki la ïaid lait ïa ka miej jong ki Babu PWD (Building) kiba dei ban khmih? Bad lada ym shym la ïaid lait te kumno ym shym la don jingkynthoh ha kita ki por? Bad lada la kynthoh te mano keiñ ba ïaid lait ïa kita kiei kiei?
Lada ki Babu PWD (Building) ki la tip ïa kitei ki jingduna bad haba ym don ba sngap ïa ki te balei kim pynpaw paidbah kumba la don teng i Ophisar ka Tnat Bording iba la mih pyrthei ban weng ïalade namar ba i ïohi badon kiei kiei ki bym long satia katkum badei ban long? Ka jingkylli kaba khadduh khadwai ka long hato ki Myntri Sorkar ki tip ne em ïa ki jingdkoh ha ki tnat Sorkar badei khmih ia kine ki kam? Bad lada ki tip te balei kim leh eiei khnang ba kane ka jingmlien ban leh tangdep ne leh klop ne kheiñ sting ïa ki kam jong u Paidbah kin sangeh shisyndon? Bad lada kim tip ïa kiei kiei ki kam umdum ba ki tnat Sorkar ki leh te Kan myntoi aïu ïa ki ban long Myntri? Ne hato ka lah mo ban long ba ki Myntri ki tip lut tangba dei ma ki hi kiba khyrwait shabi ïa ki Ophisar Sorkar kumba khyrwait shabi khun bynriew? Ne don kiwei pat ki daw sopsop? Bad lada ka Sorkar ka wanrah ïa ki developmental scheme bapher bapher hapoh ka jylla ban wanrah ïa ka roi ka par ka dei ban ai kam tang ïa kito ki contractor ki ba trei hok ïa ka kam bad don ki tract record ba bha bad dei ban pynduh kam ïa kito kiba shu trei tang dep. Halor kitei ki jingpynpaw haneng ha ka kyrteng ka Synjuk ngi pynpaw ïa ka jingpyrshah kaba jur ïa ka jinglong jingman ha ki rukom trei torti ïa ki jingtei paidbah bad ngi kyntu ïa ka Sorkar ban mih shakhmat bad pynshai sha u Paidbah ïa ki sienjam kiba kan shim halor kine kiei kiei.
