Dei ban kem ïa u kontraktor, black list ïa ka kompani bad weng kam ïa ki Engineer: WP ka UDP
Shillong, Jymmang 23 : U Working President ka United Democratic Party (UDP) uba dei ruh u President ka Shillong City bad MDC jongka Jaiaw Constituency u bah Paul Lyngdoh u la dawa ba ka sorkar ka dei ban kem mardor ïa u kontraktor, blacklist noh ïa ka Company bad wengkam noh ïa ki engineer ka tnad PWD (Building) kiba dei peit ïa ka jingtei ïa ka ïing dorbar Assembly ba thymmai ha Mawdiangdiang namar dei ka jingtrei torti kaba la wanrah ïa ka jingtwa bad jingkhyllem ka Dome ha katei ka ïing paki dulan ba dang tei thymmai ha ka step synnia Sngi U Blei por 12.30 AM.
Haba kren bad u nongthoh khubor u bah Paul u la ong “ Kane ka jingtwa ne khyllem jong kane ka Dome kaba la tei halor tnum jong ka bynta pdeng ka ïing dorbar Assembly ka la wanrah ka jinglehraiñ kaba khraw ïa ka jylla namar kat ka ïing dorbar ka ban thaw aiñ dang jia kumne. Nalor kata u la ong ka jingkren jong u Executive Engineer ba ka lah ban bakla ka jingsaiñ dur ïa ka jingtei ruh ka long ka bym lah ban pdiang. Kumno kin ïohi mynta ïa kita ki jingbakla haba baroh shi katta la tei kat kum ka jingsaiñdur jongka company kaba design ïa ka jingtei. Kane ka dei tang ka jingpyrshang ban saitkhuid bad tei pop ha kiwei. U Executive Engineer (EE) u bah Ransom Sutnga u dei ban shim ka jingkitkhlieh namar u dei ma u uba peit ban pynïaid shakhmat ïa ka jingtei ïa ka Assembly mynta”.
Nalor kane u la ong ruh ba dei ban black list ia kane ka kompani kaba na Utter Pradesh Rajkiya Nirman Nigam Ltd namar kumno kan ai sub contract sa sha ka kompani kaba la shah kyntait naduh kaba sdang kata u Badri Rai & Company uba ki jingtreikam jongu ki long kiba torti bha.
“ Kumta halor kine kiei kiei baroh nga dawa ba ka sorkar ka dei ban kem mardor ïa u kontraktor namar ka dei ka kam pyniap briew lada dei ba jia mynsngi ym tip shuh kaei ka ban jia ïa kiba trei bylla ha katei ka jaka hynrei donbok ba ka jia noh mynmiet. Nalor kata ïa ka kompani ba ïoh ïa ka kontrak dei ban blacklist noh napoh ka jylla bad weng kam ïa ki engineer kiba dei peit ïa ka jingtei ha katei ka jaka namar dei ka jingkheiñ sting ne don ei ei sha lyndet ba sa jia kane ka jingjia ” pynkut u bah Paul.