Shillong, Lber 01 : U Nongïalam ka UDP uba long long ruh u Chief Executive Member (CEM) ka KHADC Bah Titostarwell Chyne, ha ka sngi Balang u la pynpaw ba kum ka party ka don ka jingsngewskhem ba kan lah ban jop jingsngewskhem ba ka UDP kan lah ban jop 15-20 ngut ki MLA ha kane ka elekshon kaba ka jingniew vote kan long mynta ka sngi.
Haba kren sha ki la pathai khubor u Bah Titos u la ong ba namar ka jingthrang ki paidbah ban ïohi ïa ka jingkylla ki da khmih lynti ba ka party kan jop bun ngut ki MLA ha kane ka kynti kaba mynta.
“Ngi la sngewskhem ba ka UDP kan ïoh bun ngut ki MLA ha kane ka kynti. Ngi khmih lynti ban ïoh hapdeng 15-20 ngut ne palat wat ïa kata ruh” u la ong.
U la ong ba kum ka party ki la ïa shong ïa ka jingïalang ha ka sngi Ba-ar bad baroh na ki kyrtong ba ïakhun kynthup ïa ki kyrtong na Ri-lum Garo ki la pynpaw ïa ka jingsngewskhem ban jop na ki constituency ba ki mih aireng.
Haba kylli la ka UDP ha kane ka kynti kaba mynta kan long ka nongthung syiem ne kan long ka syiem ha ka sorkar ban wan, u Bah Titos u la ong ba ka ka jinglong jingman kaban mih na ka jingñiew vote kan sa batai la ka party kan dei tang ka nongkyntiew khet ne ka nongshong khet syiem.
“Baroh kan shong ha ka jinglong jingman bad ka jingïoh nombor” u la ong haba bynrap ba u kwah ban kiar na ka jingkam pynheh ban ïa ka jingshisha. U la ong “Hadien ba ngi ïoh ïa u nombor, ngin sa sngewthuh ïa kaei kaba donkam ban leh”.
U Bah Titos ula kyntait ba ka UDP ka don ïa ka jingsngewthuh jingmut bad kino kino ki seng saiñ pyrthei ha kaban thaw ïa ka Sorkar ba thymmai.
Shuh shuh u la ong ba la ong ba ha u hi shimet, u sngew ba ka party ka donkam ban ïatreilang bad kiwei ki seng saiñ pyrthei kiba lah ban ai ïa ka sorkar kaba skhem bad ba lah ban wanrah ïa ki jingkylla hapoh ka Jylla.
Haba kren halor ka jingkynnoh bamsap pyrshah ïa ka sorkar MDA, u Bah Titos ula ong ba u don ka jingsngew ba ka sorkar thymmai ka dei ban tohkit ïa kum kine ki jingkynnoh bad ban wad ïa ka jingshisha, “Ym dei ban map ïano ïano ruh lada lap ba ki donkti ha ki kam bamsap” u la ong.
