Nongstoiñ, K’lyngkot 19: Ka surok na Mawlangsu shaduh Markasa ka dei kaba donkam bha, hynrei ka jingpynsahteng jong ka sorkar ban pyndep ha ka ban siang rong ïaa ka bynta kaba sah tang kumba ar kilomitar ei ei, ka la pynlong ïaa ki paitbah ba kin shem jingeh namar ba katei ka surok ka dei kaba dang khohruh khohram.
U bah B.Rani uwei na ki riew rangbah na ka shnong Tiehdang haba pyntip ha u nongthoh khubor, u la ong ba ki nongshong shnong na katei ka thaiñ naduh Mawlangsu, Lummyrsiang, Tiehdang, Mawkyrtung bad kiwei kiwei ki shnong, haba ki leit ïaew leit hat sha Markasa bad ki leit donkam ha Mawthadraishan Block, bunsien ki hap ban ïaaid da ka kjat ha ka jing jngai kaba hynriew haduh phra kilomitar, namar ka jingbym don ki kali kiba ïaaid man ka sngi namar ka jingsniew ka surok.
U la ong ruh ba ka surok rong naduh Mawlangsu ka kut noh tang ha Mawkyrtung. Kumta ka sorkar ka la dei ban mang pisa na ka bynta ban siang pyndep noh ïaa ka rong haduh lai lad, namar ba katei ka surok ka ïaakynduh lang bad ka surok rong ka ban kiew sha Mawphanlur shaphang mihngi bad ka ban leit sha ka shnong Mawkohnoh kaba don shaphang sepngi .
U la ong ruh ba na ka liang ki paitbah jong kitei ki shnong, ki la kwah haduh katta katta ba ka sorkar kan siang rong noh ïaa katei ka surok. Ki la kyntu jur ïaa u MLA bad ka sorkar ba ka dei ban phai khmat lem sha kitei ki shnong, khnang ba ki paitbah kin lait na ki jingeh.
Bunsien ki tymmen ki kro haba ki leit sei ïaa ka bai bam tymmen jong ki na ka Bank kaba don ha Markasa, ki hap ban mih dang step bad ban ïaaid da ka kjat bad katno ka jingisynei khamtam ïaa ki tymmen kiba la palat hynriew phew snem ka karta, ba kin ïaaid da ka kjat haduh Markasa ha ka jingjngai kaba hynriew kilomitar.
Ka lynti kam dei kaba suk ïaa ki ban ïaaid ha ka por ba ki leit bad ha ka por ba ki wan phai. Kumta lada ka sorkar ka sngew synei lem ïaa ki nongshong shnong bad ki tymmen ki kro, ka la dei ban pynkloi katba lah ban siang rong noh.
