Nongpoh, K’Lyngkot 19: Ka Home Science Association of India (HSAI),Tura Chapter ryngkat ka jingïatrei lang bad ka College of Post Graduate Studies in Agricultural Sciences, Central Agricultural University (Imphal), Umiam, Ribhoi mynta ka sngi ka la pynkut noh ïa ka lympung ïakynduh lang ba la tip kum ka ‘35th Biennial Conference ba la pynlong ha Auditorium Hall katei ka University kaba don ha ICAR Umiam ha Ri Bhoi District.
Kane ka jingïakynduh lang ba la tip kum ka 35th Biennial Conference ka dei kaba la sdang naduh ka 17 tarik u Kyllalyngkot 2024 bad la pynkut noh mynta ka sngi, ha kaba ka phang pdeng katei ka jingïakynduh lang ka long,”Multidisciplinary Approach in Home and Community Science for Sustainable Development.”.
Ka S. Phangnon Konyak kum ka MP ka Lok Sabha ka la wan ban shim bynta kum ka kongsan ha ryngkat ka jingdon lang u Prof. P.Das, u DDG barim ka ICAR bad kynthup ruh Prof. Prabha Shukla, Vice Chancellor NEHU, Shillong, u Dr. V.K. Mishra, Director ICAR- NEH Region, Umiam bad kiwei kiwei ki riew shemphang ha ka kam rep ka kam riang.
Ha kane ka sngi, ka Prof. Vasugi Raaja, President ka HSAI ka la ai ruh ïa ka kaiphod jong kane ka Conference halor ki jingpynlong ïa ki prokram bapher bapher ha kane ka Conference bad ka la ïathuh ruh ba ha kane ka Conference la wan ban shim bynta da ki samla pule na ki 24 tylli ki jylla ka Ri India kynthup ruh naduh ki samla pule bad ki professor.
Haba kren ha kane ka sngi kum ka kongsan, ka S. Phangnon Konyak ka la ban khia halor ki bynta kiba khraw ba la leh da ki kynthei bad ka ai ruh ka jingïaroh halor ka jingpynlong ïa kane ka lympung ban tip halor kata ka Home Science khamtam ki Longkmie kiba don bynta ban wan rah ïa kata ka jingkylla ha ka ri lyngba ki kam kiba ki trei ban kyntiew ïa ka imlang ka sahlang katkum ka jingstad saian.
Shuh shuh, ka la kren ruh halro ka thong jong ka Viksit Bharat, ba ka thong jong ka sorkar India ha ka jingïalam u Narendra Modi kum u Myntri rangbah ka long ban wan rah ïa ka jingkylla ba ka ri India ka dei ban kiew shaphrang ha baroh ki liang ba la buh thong haduh u snem 1947 ba ka ri India ka la dei ban kiew ha baroh ki liang.
Kum ka jingpynshlur ïa ki riew shemphang kiba la wan ban shim bytna ha kane ka lympung, la sam rh ai ki khusnam sha ki professor bad ki Student ha kaba ïa ka nam best young scientist award la rah da ka samla Fenny Leferty Kharpuri, ka nam senior scientist award la rah da ka Rekha Vyas ryngkat kiwei kiwei ki khusnam jingpynshlur ïa kiba la wan ban shim bynta ha kane ka lympung.
