Shillong, Nailar 21: Hynne ka step Lah Sngi U Blei, ka Hynñiewtrep National Youth Front (HNYF) kaba ju ai jingkyrshan na ka por sha ka por ïa ki nongïakhun kti ka jylla ryngkat bad ka MAWA ki la pynlong ïa ka jingïakynduh kaba kyrpang ban kitbok kitrwiang ïa ki nongïakhunkti ka jylla ki ba la shah jied ban mihkhmat ïa ka ri ha rynsan ïakhun kaba la tip kum ka World Arm Wrestling Championship 2023.
ïa kane ka jingïakynduhlang la ïoh ban pynlong ha madan Malki, ha ka por 7 baje mynstep shuwa ba kitei ki phra ngut shuwa ba kin mih nangne na nongbah Shillong.
Kine ki phra ngut ki nongïakhunkti ka Meghalaya kiba lah shah jied ban leit mih khmat ïa ka Ri India haka World Arm Wrestling Championship 2023 ka ban long ha Almaty, Kazakhstan ki kynthup ïa u Shanborlang Siangshai, u Alexander Lyngdoh, u Banbatjuban Khongwir, u Aiboklang Paul Wanniang, Aiboklin Rina, ka Bandarika Kharkongor, u Alan Sun Marbaniang, u Everson Thangkhiew. Bad la leit ban synranlang da u Bah Junestar Kharbuli, u Bah Nick Nonglyer bad i Kong Sumita Kshiar.
Kane ka World Arm Wrestling Championship 2023 kan sa ïoh ban sdang ha ka 24 tarik u Nailar bad kan kut haduh ka 3 tarik u Nailur, 2023.
Ha kane ka step shuwa ba kine ki 11 ngut kin mih na nongbah Shillong, la ïoh ban ïadon ryngkatlang bad u President ka MAWA, u Bah Junestar Kharbuli, u President lem bad u Secretary jong ka HNYF – East Khasi Hills District, u Bah Bless Dkhar bad u Bah Stevenson Raymond Khyriem ryngkat bad i Tbn ka balang Malki Presbyterian, i Bah Robert Mawthoh i ba la ïalam ïa baroh ki ba ia donlang ha ka jingduwai kyrpang.
