Lahduh ka St Anthony’s na ki shynrang, ka O.M. Roy Memorial Higher Sec. School na ki kynthei

Shillong, Nailar 21: Ka All Meghalaya Karate-Do Association ha ryngkat ka jingïatreilang bad ka Directorate of Sports & Youth Affairs, ka la ïoh ban pynhap pyrda noh ïa ka 29th Inter School & 11th Inter College Karate Tournament 2023, ha kaba ïa ka namlahduh napdeng ki skul bad College la rah da ka St Anthony’s katba ïa ka namlahduh napdeng ki kynthei la rah da ka O.M. Roy Memorial Higher Secondary School.
Kumban shu pynkynmaw, la plie pyrda ïa kane ka tournament ha ka 17 tarik mynta u Nailar ha ka jingïadon ryngkatlang u Bah Shakliar Warjri, myntri ka kam Sport kum u Kongsan.
Haba phai sha ka thup kyrdan shynrang jong ki skul, ka St. Anthony’s H.S. Schoo ka la ïoh ban rah ïa ka namjop katba ka St. Anthony’s L. P. School ka la wan ha ka kyrdan ba ar.
Ka lahduh jong ki skul napdeng ki kynthei la jop da ka O.M. Roy Memorial Higher Secondary School katba ïa ka kyrdan ba ar la khur da ka Providence School.
Ha ka kyrdan ïakop ki shynrang na ki College, ïa ka kyrdan ba nyngkong la khur da ka St. Anthony’s College, katba ka Shillong College ka la wan ha ka kyrdan ba ar.
ïa ka nam Best Karateka (Boys Junior) la khur da u Darren R Warjri jong ka Christian Academy Higher Secondary School. U Paul Danny Kharmudai jong ka Providence School u la ïoh ïa ka nam Best Karateka (Boys Senior).
Ka nam Best Karateka (Girls Junior) la khur da ka Xenia Rose Nongsiej jong ka St Joseph’s Higher Secondary School, Pynthorumkhrah, katba ïa ka Best Karateka (Girls Senior) la khur da ka Rebeka Nongspung jong ka Providence School.
Ha kane ka sngi pynkut ïa kane ka lympung la wan pynhap pyrda noh da u Ian Campbell, Olympian bad Founder Arms Physical Testing kum u kongsan ha ryngkat bad u Robert Kabbas, Olympian bad u ba la khur takma rupa ha u snem 1984 jong ka Summer Olympic, Atlanta kum u symbud kongsan.