Shillong, Nailar 21: Hynne ka Lah Sngi U Blei, ka BSF Meghalaya Frontier ka la ïoh ban plie pyrda ïa ka Inter-Frontier Judo Cluster Competition 2023, ïa kaba la pynkhreh ban pynlong ha NEHU, Shillong naduh hynne ka 21 tarik haduh 25 tarik u Nailar, 2023.
Ha kane ka lympung ki la don kumba 11 tylli ki tnat shipai BSF Frontier kiba la wan ban ïashimbynta ha kane ka tournament, ha kaba baroh ki la angnud ban sei madan ïa la ka jong ka sap, ki buit, ha ka jingïakhun ka jong ki ban ïohrah ïa ka khusnam kaba ki thrang ban khur.
La ïoh ban plie pyrda ïa kane ka jingïalehkai ha NEHU, Shillong ha ka jingïadon ryngkatlang bad u Dr. Lajja Ram Bishnoi, IPS, Director General of Police, Meghalaya akum u kongsan, bad la wan ban synranlang da u Sh. Pradip Kumar IPS, Inspector General jong ka BSF Meghalaya Frontier kum u symbud kongsan, lem bad kiwei kiba dei ki dkhot na kiwei pat ki agency. La ïoh ban tian smai ha kane ka sngi plie pyrda, nangta bud sa ka jingïaid march past na ki kynhun ba ïashimbynta ha kane ka lympung, ka jingrwai pynbyrñia na ka BSF, bad ka jingshad tynrai na ki kynhun bad ki khynnah jong ka BSF School.
Shuh shuh, na ka liang jong u Dr. Lajja Ram Bishnoi, u ba la wan ha kane ka sngi plie pyrda kum u kongsan, u la ai ka jingïaroh sha kine ki kynhun kiba la wan ban ïashimbtynta bad pynshlur ïa ki ba kin sei madan ïa la ka jong ka sap,ka bor, bad ruh ban pynleit jingmut sha ka thong katba katba ha kajuh ka por ban don ka jingsngewjan bad ki para nonglehkai.
U la bynrap ruh da kaba pynpaw ba u sngewthuh ïa ka jingdonkam jong ka Sport khamtam ïa ki dkhot jong ka BSF, ban kyntiew ïa ka koit ka khiah jong ka met bad ruh ban wanrah ka jingïatylli. U la ïaroh ïa ka BSF kaba la trei shitom ban kyntiew ïa ka sport na kawei ka por sha kawei pat.
