Ha u snem 2020, ka sorkar pdeng ka la thaw da kawei ka National Education Policy ban pyntreikam ha baroh ki skul, ki kolej bad ki skul bah jong ka ri baroh kawei. Ka jingthmu jong ka sorkar haba wanrah ïa kane ka Polisi thymmai ka long ban nang pynbha bad kyntiew shuh shuh ïa ka pule puthi jong ki khynnah skul bad ki samla pule da kaba wanrah ïa kiei kiei kiba thymmai bad kiban kham ïarap ïa ka pule puthi ha ka ri.
Ha Meghalaya, hadien lai snem ba la wanrah ïa kane ka Policy, la ïohi na ka liang ka skul bah North Eastern Hill University (NEHU) ka la rai ban pyntreikam noh naduh ka snem pule lane ka academic year mynta u snem 2023- ’24, kata naduh ka 1 tarik u Nailar 2023.
Hynrei ïa kane ka jingpynbna ka NEHU ban pyntreikam noh ïa ka NEP 2020 mynta hi snem la ïeng pyrshah jur da ka Synjuk ki Nonghikai College ha jylla kata ka Meghalaya College Teachers Association (MCTA) da kaba ong ba kadei ka rai kaba la shu leh kyrkieh khlem da ïa mynjurlang ki College kiba la affiliate bad ka NEHU. Mynta ka MCTA ka ïaid da ka jingtreikam ban nym ïatreilang bad ka NEHU ne ka non cooperation movement ha kaba kim shyn la treh ban shim class da ki course ka NEP 2020, hynrei ki la shim class da ka course kaba rim. Te shano kane kan poi bad sha ei ka lawei ki samla kan poi haba kam don ka jingïabeit kaba kum kane.
Ka NEHu ka la ong ba lyngba ka NEP 2020, kan pyntreikam ïa ka Four-Year Undergraduate Programme (FYUP) bad kan pdiang ruh ïa ki jingpynrung thymmai ki samla pule da ka ba pdiang ïa ka Certificate jong ki Diploma bad ka Degree haba kut jong ka First, Second bad Third year.
U Prof Shukla u la ïathuh ba ka NEHU ka la dep ban pyntreikam ïa ka NEP 2020 na ka bynta ki kyrdan Post Graduate (PG) na bynta u snem 2022-2023 bad naduh 1 tarik Nailar 2023, ka NEHU kan pyntreikam ïa ka NEP 2020 na ka bynta ki kyrdan pule Under Graduate (UG). U VC u la ïathuh ruh ba ka skulbah kam pat ïoh ïa ka jubab haba ïadei bad ka shithi ba la phah ban pyntreikam ïa ka NEP bad ki don katto katne ki College kiba pynpaw ka jingeh ban pyntreikam ïa ka. Hynrei na ka liang ka NEHU ka la bthah ïa ki ban pyntip, balei kim lah ban pyntreikam khnang ba ka NEHU kan lah ban kner jingïarap sha kum kita ki College.
Katba na ka liang ka MCTA pat ka la ong ba ka jingpyntreikam ïa ka NEP 2020, kadei kaba la shu rai hi da ka NEHU namar ba ha ka jingïalang jong ka Adacemic Council kaba 110, ha kaba ka MCTA ruh ka don ki dkhot ha kane ka Council, ym shym la shim kano kano ka rai ban pyntreikam noh ïa ka NEP 2020 naduh mynta snem, pynban ha kane ka jingïalang la rai ban ieh shuwa ïa ka jingpyntreikam, hynrei ban shna shuwa ïa ki Curriculum, ki Syllabus bad ka jingpynkhreh ruh jong ki College bapher bapher ban pyntreikam noh ïa ka NEP 2020.
Ka Synjuk ki Nonghikai ka la pynpaw ba ïamynta hi ki College kim pat long kiba la khreh, namar ba ka NEHU ka la shu pyntreikam kyrkieh, ha kaba kiba bun ki College kim pat biang ki Nonghikai ban sdang noh ïa kane ka Polisi kaba thymmai. Ka MCTA ka la rai ruh ba naduh ka 1 tarik u Nailar 2023, ka sngi ba pyntreikam ka University ïa ka NEP, baroh ki dkhot kata ki nonghikai ba don ha kane ka Synjuk kin nym shim klas ïa ki First Semester ha baroh ki Subject.
Lyngba kane, sa shisien pat ki samla pule kin mad jingeh namar ka jingïatyngkhuh hapdeng ki Nonghikai College bad ka NEHU. La ïohi ruh ba ka sorkar jylla ka la thet kti bad kam shym la tuklar eiei halor kane bad ka la shu ieh kumto ban ïashrut hapdeng ka NEHU bad ka MCTA, katba ki samla pule pat ki la nang kulmar jingmut.
Kan long kaba bha shibun lada ka NEHU, ka MCTA bad ka sorkar jylla ki ïapynbeit kloi, khnang ba kan nym long ka jingduh ïa ki Samla pule.
