Khliehriat nailar 21: Ka Jaiñtia National Council Jalaphet Unit, ka pynrem jur ïa ka ki kam runar jong uwei u bar jylla uba halor ka jingkynnoh ba u donkti ban thombor ia ka longrynieng jong kawei ka heprit
Halor kane ki nongïalam bad ki dkhot jong ka seng ki la iathuh ba ki la synran lang ïa kiba ha iïng ha sem sha Khiehriat ban bud dien halor katei ka kam na ki bor jong ka aiñ. Ki la iathuh ruh ba na ka liang ki bor pulit ki la kem ïa utei u runar.
U President JNC Jalaphet Unit, u bah Andy Bareh, u la ong ba ka seng ka pynrem jur bad sngew bitar ïa katei ka jingleh kam runar utei u bar jylla uba shu wan trei bylla sha kane ka thaiñ, ka seng ka kyntu jur ïa ki bor jong ka aiñ ba kin ialeh shitom ban tehlakam bha bad ban peit bha ïa ka jingwan rung ki bar ri bad bar jylla sha kane ka thaiñ kiba wan trei bylla, namar ka buh jingma ïa ka imlang ka sahlang bad ki ju long ruh ki maw jynthut ka bym don jingshngaiñ ïa ki kynthei ki khynnah.
Na ka liang ka seng JNC, ka dawa ba dei ban set patok shi jingim ïa utei u runar uba leh ïa ka kam bymman.
Ka seng ka byrngem ruh ba kan sa pynjur ïa ka jingkhynra bar jylla ha ki shnong ki thaw bad leh ruh da kaba tyngeh bad ka seng ka bthah ruh ba nangne shakhmat khamtam ïa ki bar jylla ba ki dei ban nang bha ka burom ka akor bad niew burom ruh khamtam ïaki trai ri trai muluk, pynkut u kyrwoh na u Vice President JNC Jalaphet Unit,, u bah Phrangsngi Chyrmang.
