Shillong, Naiwieng 11 : Ka jingpynkhreh na bynta ka jingsdang noh ïa ka jingpule doktor (MBBS) kaba nyngkong eh jong ka PA Sangma International Medical College (PIMC) ka la sdang hynne ka sngi ha Central Auditorium jong ka University of Science and Technology Meghalaya (USTM).
Kane ka prokram kan neh na bynta 14 sngi kaba long ruh ka dak jong ka jingsdang ïa ka lynnong kaba thymmai bad kaba nyngkong eh ha ka thaiñ ha ka liang ka jingpule doktor.
Ha kane ka sngi khraw la donlang bun ki riewshemphang kiba kynthup ïa u Padma Shri Prof. Dr. Seyed Ehtesham Hasnain, National Science Chair, IIT New Delhi, Vice-Chancellor barim ka Jamia Hamdard bad University ka Hyderabad.
Kiwei pat ki nongkren ki kynthup ïa u Mahbubul Hoque, Chancellor ka USTM; Prof. GD Sharma, Vice Chancellor ka USTM; Dr. BK Das, Principal ka PIMC; Dr. Jogesh Sharma, Director ka Medical Education and Research, PIMC; bad Dr. (Prof) Bhabani Prasad Chakravarty, Medical Director jong ka Health City Hospital.
Kane ka prokram kan sakhi ruh ïa ka jingshim bynta shitrhem na ki Head jong ki Department bapher bapher, ki nonghikai, ki samla pule doktor ba thymmai ryngkat ki kmie ki kpa bad ki bahaiing.
Haba kren ha kane ka sngi, u Prof. Dr. Seyed Ehtesham Hasnain u la ai ka jingïaroh ïa ka jingïohi jngai jong u Chancellor Mahbubul Hoque halor kane ka phang da kaba ong ba lyngba kane ka sienjam kin sa ïohi ïa ka jingkylla ha ki 5 bad 10 snem kiban wan.
“Ka jingsdang jongka PIMC ka long kaba ai mynsiem haduh katta katta, lada ka long katne mynta, mutdur katno kan long ha ki 5 bad 10 snem kiban wan,” u la ong.
Na ka liang u Chancellor Mahbubul Hoque pat u la ong ba kane ka Medical College ka long kaba kyrpang bha khamtam haba ka ïa hap bha bad ka thong jong ka USTM .
La ïoh ruh ïa ka jingkren na u Dr. BK Das, Principal ka PIMC, ba la ai mynsiem bad pynshlur ïa ki samla pule da kaba kyntu ba kin mih shakhmat ban ai jingmut lane kylli lada ki lap lane shem kano kano kaba ki kwah jingshai.
Kiwei pat kiba kren ki kynthup ïa u Dr. (Prof) Bhabani Prasad Chakravarty, nangta u Prof. GD Sharma, Vice Chancellor ka USTM bad u Dr. Jogesh Sharma.
Ka prokram ha kane ka sngi ka sdang da ka jingïaid proseshon ha ka por mynstep na PIMC Academic Block sha Central Auditorium ha kaba la wan ban shim bynta naduh ki nonghikai, ki samla pule doktor ryngkat ki riam lieh, ki kmie ki kpa bad ki bahaiing ha sem baroh.
