Shillong, Naiwieng 11 : U heh pulit ba rim ka jylla, Bah Francis G Kharshiing, u ba la shah thung dang shen kum u Mission Director jong ka Drug Reduction, Elimination, and Action Mission (DREAM) ha ka sngi Nyngkong u la ong ba u kwah ban treilang bad ki bor shnong na ka bynta ban rat dyngkhong ïa ka jingjyllei u drok ha kane ka jylla.
“Ngi hap ban pynlong bun ki jingpynshai paidbah bad ïa kane lah ban leh tang da kaba trei lang bad ki shnong, ki kynhun, ki seng bad kumjuh bad kito kiba pyndonkam,” ong u Bah Francis haba kren bad ki lad pathai khubor hadien ba u la wan ban kynduh ïa u Myntri ka tnad Social Welfare ka Jylla, Bah Paul Lyngdoh.
Shuh shuh u ong ruh ba kin sdang noh ïa ka kam da kaba ïaid bad treilang bad ki paidbah ka jylla.
Ha kajuh ka por kum u heh pulit barim ka jylla, u la mynjur ïa ka jingdawa ba donkam ban don la ka jong ka tnad pulit kaban peit kyrpang na ka bynta ban ïakhun ha kane ka thma pyrshah drok.
“Ki pulit ka jylla ki la khia lypa ka kam bad kane ruh kadei kawei pat ka ishu kaba khia ha ka jylla da kaba jingnang bun ki nongpyndonkam drok bad ka jingwan rung u drok sha ka jylla. Kumta ïa kane lah ban leh ei ei bad kane kan ïarap lada ngi lah ban leh kumta,” bynrap biang une u Mission Director ba thymmai jong ka DREAM Project.
U Bah Francis u la pyntip ruh ba u la dep ban pynpaw ha u Myntri ba un sa khot ïa ka jingïalang bad ki katto katne ki nongshong shnong ka jylla ha ka 13tarik mynta u bnai.
Shuh shuh u ong ba watla kane ka kam kan ym lah ban pyni dak mynta mynta hynrei u pynpaw pat ïa ka jingkyrmen ba kum u Director un ai kaba bha tam khnang ba kane ka projek kan lah ban leh ei ei na ka bynta ban ïakhun pyrshah ïa u drok.
