Shongkun ka jingrakhe dap 50 snem ka shnong Nongthymmai ha Ri Bhoi

0

Nongpoh, Kyllalyngkot 07: Kum ban kyrtiang dien biang sha ki 50 tylli ki snem ba ïa ka shnong Nongthymmai la suit la shor bad ba la pynlong shnong pynlong thaw naduh ki snem 1972, ka Shnong Nongthymmai ba hap ha ka Raid Madan Kyrdem ha Ri Bhoi District ha ka 31 tarik u Nohprah 2022 ka la lah ban pynhap pyrda noh ïa ka jingrakhe dap 50 snem jong katei ka shnong.
Ïa kane ka jingpynhap pyrda jong ka jingrakhe dap 50 snem katei ka shnong la wan ban pynhap pyrda da u Bah Dabaitbha Lamare, uba dei uwei na u khun samla ha katei ka thaiñ bad la sakhi lang ruh da ka jingdon lang u Sirdar ka Raid Madan Kyrdem, u Bah Pholning Makdoh, u Officer Incharge ka Khapmara PIC, u Pyniar Thabah, ki rangbah shnong na ki shnong ba hap ha ka Raid Kyrdem bad kynthup ruh kiwei kiwei ki riew rangbah.
Ha kane ka sngi la pynphuh pynphieng ruh da ki jingtem tynrai ba la pynkhreh da ki khun samla ka shnong Nongthymmai bad ruh ki jingshad na ki Longkmie kiba la pynpaw ka jingkmen ban ioh rakhe ïa kane ka jingdap 50 snem jong ka shnong.
Ha kane ka sngi, na ka liang ka shnong kum shi bynta ban ai burom ïa ki Rangbah Shnong bad ki Seng Longkmie kiba la don bynta naduh ka por ba la seng ïa kane ka shnong, ka la pynkup burom bad ai ruh da ki jingai sngewbha ban sah jingkynmaw halor ki synñiang ki bynhei ba ki la noh sha ka shnong ban ai kata ka jingshakri kumba kane ka shnong ka la sdang ban kiew ha baroh ki liang.
Ha kane ka sngi la pule ruh ïa ka histori lyngkot jong ka jingïaid lynti jong ka shnong ba la pule da u Bah Bhalad Mukhim, uba dei uwei na u nongïalam shnong barim katei ka shnong bad ha katei ka jingpule ïa ka histori la ioh sngew ïa shibun ki jingshakri jong ki nongïalam kiba la im sngi ban kyntiew ïa kane ka shnong kaba ka la kiew irat ha baroh ki liang.
Haba kren ha kane ka sngi kum u kongsan, u Bah Dabaitbha Lamare u la ai ka jingïaroh ïa ka Shnong Nongthymmai kana la lah ban rakhe ïa kane ka jingdap 50 snem ka jingïaid lynti jong ka shnong bad u la pynpaw ruh ba kum u samla u sngewhuh shai ba ki nongïalam kiba la leit noh ki la mad shibun ki jingeh bad ki jingtynjuh ban ïalam ïa ka shnong, hynrei namar ba ki don kata ka mynsiem jong ka jingkitkhlieh kane ka shnong ka la dang kiew da jingsaindur jong ki kum kita ki nongïalam kiba la don bynta naduh ba la seng ïa kane ka shnong bad haduh ki nongïalam ba mynta kiba la don bynta ban rakhe ïa kane ka jingdap 50 snem jong ka shnong.
Kawei na ka symboh pyrkhat ba la pynpaw da u Samla Dabaitbha Lamare, ka dei ka jingkyntu ïa ki nongshong shnong ba ki dang dei ban don ka mynsiem jong ka jingïatylli bad ka jingïaieit, namar haba don ka jingïatylli bad ka jingïatrei lang kum ka shnong kan lah ban wan rah shibun ki jingkylla ha ka bha ka miat, ka roi ka par bad ka ioh ka kiot jong ki nongshong shnong bad khamtam ba ka shnong ba kan dang lah ban pynmih shibun ki khlur na kane ka shnong kiba kit ban bah ïa kane ka shnong, u la bynrap.

Leave A Reply

Your email address will not be published.