Nang jur ka jingpom pathar ïa ki khlaw ban thang rnga ha West Khasi Hills

0

Nongstoiñ, K’lyngkot, 7: Ka jingpom pathar ïa ki khlaw ki btap ha West Khasi Hills ka dang ïai bteng ym tang na ka bynta ban shalan ïa ki dieng sha ki karkhana kiba don ha kylleng ki jaka. Hynrei kaba kham isangsot ka long ka jingpom pathar na ka bynta ban thang rnga ban shalan ha ka karkhana saiñ nar ha kane ka District bad ban pyndap rnga ruh sha ki spah tylli ki karkhana saiñ nar kiba don ha Byrnihat Ribhoi District.
Ha kaba ïadei bad ka jingbteng jong ka jingpom pathar ïa ki khlaw ban thang rnga, bun ki paidbah nongshong shnong bad ki riew rangbah ki la pynpaw ïa ka jinglyngngoh halor ka jingbym tuklar jong ka Assembly Committee on Environment, ha kaba ki la ong ba katkum ka jingsngewthuh jong ki, ka ktien environment ka kynthup ruh ïa ki khlaw ki btap bad ka jingpynjot bad pom pathar khlem kheiñ shuh ïa ki dieng kiba rit ba ria ban thang rnga haduh ba ki khlaw kin da synlen lut khait ka ktah haduh katta katta ïa ka mariang.
U bah P.S.Lyngdoh Marshilong haba ïa kren bad u nongthoh khubor, u la ong ba ki dkhot jong ka Assembly Committee on Environment, ki la hiar sha Rwiang ban jurip ïa ka jingtrei kam jong ka karkhana saiñ nar ha Rwiang bad ki la hiar shaduh Shallang ban jurip ïa ki karkhana saiñ dewïong.
Hynrei haduh mynta ka jingshalan rnga ha ka karkhana saiñ nar ha Rwiang ka dang ïai bteng. Nalorkata u la ong ruh ba lada katei ka jingshalan rnga ha katei ka karkhana kan dang ïai bteng, tang hadien san snem ki khlaw ha katei ka thaiñ naduh Mawlangdep sha duh Langja, na Mawruksoiñ shaduh Nongmisei bad Shahlang kin syllen lut.
U la ong ba ka jingbym tuklar jong katei ka Committee ha kaba ïadei bad ka jingpynjot pathar ïa ki khlaw, ka pynpaw ba ki dkhot katei ka Komiti ki la klet noh ba ka jingpynsyllen ïa ki khlaw ka ktah haduh katta katta ïa ka mariang bad ka dei ruh ka daw jong ka jingkylla khongpong jong ki aïom kat haduh ba ka rep ka riang kam long shuh kumba ju long ha ki snem ba mynshuwa.
Nalorkata na ka jinglynshop jong ki bor ka mariang kum ki erïong erngit, ka jingtwa ki lum ki wah ha ka por slap na ka daw jong ka jingbym skhem shuh ka khyndew, namar ym don shuh ki thied dieng kiba kjit ïa ka jingsngem ka khyndew ka wanrah ïa ka jingjot jong ki ïing ki sem jong ki nongshong shnong. Ha kajuh ka por la ong ba ïa ki nongthang rnga yn ym don ba lah ban khang bad kin ym kohnguh hi ruh hynrei lada ym don shuh ba thied rnga kin ym thang satia.
U la pynkynmaw ruh ba ka Ïingbishar ba ha khlieh duh jong ka ri India ka Supreme Court ba don burom, ha ki snem ba la dep ka la pynmih ïa ka jingpynbna ba ïa ka jingshalan rnga la ñiew beaiñ bad ki sorkar jong baroh ki jylla ki dei ban pyntreikam da ki aiñ ba pyrkhing.
Hynrei kaba lyngngoh ka long ba kane ka sorkar ha ka jylla Meghalaya kam shym la burom satia ïa katei ka jingpynbna. Ka jingbym burom jong ka sorkar ïa ka jingpynbna jong ka Supreme Court ba don burom, ka pynpaw shai kdar ba ka lah ban don kaei re kaei sha lyndet, lymda kumta kumno kan shu sngap jar bad kam leh ei ei ïa ki kali kit rnga kiba ïaid ha surok bah man la ka sngi.
La ong ba haba bret ïa ki plastic song kwai dong, ka sorkar ka ong ka ktah ïa ka mariang, haba thang da ki dieng ïap ha ïing ka ong ka ktah ïa ka mariang, lada tih shyiap bad tih maw ka ong ka ktah ïa ka mariang, haba tih dewïong thliew khnai khlem da pynkhyllem ne pynjot ïa ki dieng ki siej ka ktah ïa ka mariang. Te hato lada ym don shuh ki khlaw ka ktah ne em ïa ka mariang. Ha kaba ïadei bad kane ka mat ka shong sa tang ha ka sorkar ba kan pynshai khnang ba ki paidbah kin ym sah ha ka lyngngoh.

Leave A Reply

Your email address will not be published.