Ki Shnong ki dei ban leh tyngeh ïa ka jingpynïap beiñ ïa ki mrad: S.Syiemlieh

0

Nongstoiñ, Nohprah, 7: Ka West Khasi Hills ha ki snem ba mynshuwa eh, ka dei ka District kaba dap da ki mrad ki mreng ki sim ki doh kiba bun jait, namar ka dap da ki khlaw bah kiba rben hynrei katba nang mih ki snem ki khlaw ki la nang duna. Na ka jingduna ki khlaw ki mrad ki mreng bad ki sim ki doh ruh ki la jan duh jait.
Ha kaba ïadei bad katei ka mat, u bah Sevenstar Syiemlieh na ka shnong Nonglang, u la ong ba ka por ka la dei ïa ki nongsynshar shnong ba kin teh lakam ïa ka jingpynïap pathar ïa ki mrad ki mreng bad ki sim ki doh, namar baroh ki shnong ki don la u jong u pud u sam u ba biang kumta kam don jingeh ban khanglad ïa katei ka kam.
Nalorkata u la ong ruh ba ki briew ki ju pynïap ïa ki mrad da ki rukom bapher bapher, kum da kaba shu leit sikar marwei marwei, da kaba pyndonkam da ka suloi ha ka por mynmiet. Nangta da kaba shu riam da ki jingriam ba bun jait bad da kaba leit beh da ka kynhun.
Utei u rangbah u la ong ruh ba ki nongsynshar shnong ki la dei ban ïatreilang bad ka tnad treikam jong ka sorkar ka Wildlife Department, namar lada ki nongsiat bad ki nongbeh mrad ki ïaleh pyrshah, ki bor sorkar ki hap ban pynshitom. U la ong ruh ba ki bor synshar shnong ki la dei ban pynsngewthuh ruh ïa ki paidbah nongshong shnong, ba kim dei ban pynjot pathar ïa ki khlaw ki btap khnang ba ki mrad bad ki sim ki doh kin ïoh ïa ki jaka rieh kiba biang.
U la ong ruh ba wat la baroh ki khlaw ki btap ha kylleng ki shnong bad ki jaka ki dei ki khlaw jong ki riew shimet, kumta ka long kaba eh ban khang namar kiba bun ki ju ong ba ki hap ban pom bad ai wai ïa ki khlaw jong ki namar ba ki donkam pisa. Hynrei, donkam pat ban pyrkhat ïa ka lawei jong ka pateng ban wan, namar haba ki khlaw kim don shuh ka jingktah ïa ka mariang ka nang jur, ki umpohliew ki rngad lut, ki wah ki nang rit bad kan poi ka por ba wat tang ka um ban dih ruh la shitom ban ïoh.
U la ong ba ha kine ki snem wat hapdeng ka lyiur ruh ka um ha ki wah ka heh tang ha ka por ba jur slap, hynrei tang hadien katto katne por ba u slap u la sangeh ki wah ki la rit kum ha ka por tlang. Kumta lada ki paidbah kim kyndit bynriew noh mynta kan long ka jingtim ïa ka lawei ban wan.

Leave A Reply

Your email address will not be published.