Thnum ki paidbah bym biang ka bor ding, kiew ka bai thang man ka por

0

Nongstoiñ, K’lyngkot, 7: Ka jingkiew jong ka bai thang bor ding man ka por ka la buh ïa ki paidbah ha ka jingeh, namar kim ju ïoh ban pyndonkam pura kumba ka dei ban long. Bun ki paidbah nongkyndong ha West Khasi Hills haba pyntip ha u nongthoh khubor, ki la ong ba kumba ka long mynta ka bor ding elektrik kam ju biang satia bad kim shym la ïoh ban pyndonkam ha ka rukom ba dei katkum ka jingdonkam jong ki. Ki la ong ruh ba wat la ka bording kam biang hynrei ka bill pat ka kiew bha haba ïa nujor bad u snem ba la dep.
Don ruh kiba ong ba wat ha ki jaka ba kham long sor kum ha Nongstoiñ bad kiwei kiwei ka bording kam ju biang satia bad ka pynthut haduh katta katta ïa ka jingtreikam, khamtam eh ïa kito kiba trei bylla da kaba pyndon kam da ka ding elektrik kum ki karkhana shna kali, ki jaka shna grill, ki dukan type kot bad kiwei kiwei.
Ki la ong ba ka jingkiew ka bai thang bording ka la jan kot mar shiteng ïa kaba ki ju siew ha ki snem ba la dep. Kumta ka buh jingeh haduh katta katta ïa ki nongpyndonkam ba kin siew ïa ki bill.
Ha kaba ïadei bad katei ka mat na ka liang ki paidbah ki la thnum bad bynñiaw, da kaba ong ba ha ki snem ba la dep ba ka don ka jingkhang dam na ka bynta ban ïada na ka jingsaphriang jong ka khlam Covid 19, ka la don ka jingdkoh kaba jur ha ka kami kajih, ka bylla ka sngi bad ka ïoh ka kot ruh ka la hiar shaba palat.
Kumta ki la kyrpad ïa ki bor ba dei peit ïa ka bording ba kin thaw ki lad ki lynti ban pynduna khyndiat khynsoit ïa ka bai thang bording, khnang ba kan ym ktah palat ïa ki longïing kiba duk ba suk.

Leave A Reply

Your email address will not be published.