Mynsaw jur u rangbah ba hap u sainar lait ha shnong Nongdiwah

Nongstoiñ, Jymmang 26: Ka Hynñiewtrep Youths Council Umyiap Area Unit ka la dawa na ka tnad sam bording ka jylla ban pynkynriah noh ïa ka laiñ na ka ïing ba jia ka jingjia hap u sainar lait kaba don ha ka shnong Nongdiwah. Ka seng ka la dawa ruh ba dei ban siew sha u rangbah u ba dei u kpa ka ïing bah Savio Marngar 65 snem ka karta u ba la mynsaw na ka jinghap saiñar lait.
U Samla Olivertwist Marngar ryngkat u samla Redyfernandy Sun President HYC Nongstoiñ Circle bad bah Lumlang Kharsyiemlieh President WKHD, ki la ïoh ban ïakynduh markhmat bad u SDO ka tnad MePDCL ryngkat ka jingthoh ba u dei ban shimkhïa halor kane ka bynta.
Na ka liang ka seng ka kyrpad ban pynkynriah noh ïa laiñ na ka Ïing jong ki ban lait ka mynsaw biang hadien, ha kaba u SDO u la kular ban pynrïah noh khyndiat ban lait ïa ka phyllaw jong ka Ïing.
Nangta ka HYC ka kyrpad ban pynkynriah noh ïa la laiñ heh na katei ka jaka ter ter, namar ka jan ruh bad ka madan skul St Domanic RC LP school Nongdiwah. U SDO u lah kular ban shimkhia ban phah proposal ban pynkynriah noh hadien ym ïa mynta.
Ka seng ka la ban jur khamtam ban ïarap pisa ïa utei u rangbah namar haduh mynta u dang shitom jur naduh ka jingjia kaba la jia ha ka miet 25.5.2026 ha ka por 9 baje ei ei. Kumba long mynta u don ha ICU jong ka Woodland Hospital Shillong.
Halor kane ruh na ka liang ka Office MePDCL lyngba u SDO ka la kular ban ïarap ban thaw lad kumno ban leh halor kane ka kam. Na ka liang ka seng kan ïai buddien ïa kane ka kam bad kyrmen ba ka Office kan leh kumba la ïakrenlang.