Shongkun ka jinglehkmen tamasa Lukha Festival ha rud ka wah Lukha ha Sonapyrdi

Khliehriat rymphang 3 : Ki paidbah kynthup naduh ki khynnah, ki samla, ki rangbah bad ki tymmen, na ki shnong bapher bapher, na jan bad na jngai, mynta ka sngi ki la wan ban pynsngewbha ïalade bad ka mei mariang ha ka tamasa kaba lai, ka Lukha Festival kaba la pynlong harud ka wah Lukha, ha Sonapyrdi, East Jaiñtia Hills District, ïa kane ka tamasa la khot pynlong bad la pynbit pynbiang da ka Sonapyrdi Tourism and Ecconomic Development Society (STEDS).
U Principal jong ka Jaiñtia Eastern College Khliehriat, u Dr Phervision Nongtdu, u la wan ban long kum u Kongsan uba la plie ïa kane ka tamasa Lukha Festival ha kane ka sngi bad haba kren ha ka lympung, u la ai mynsiem bad pynshlur ïa ki nongïalam jong ka STEDS ba kin nang ïaid shaphrang bad kular ruh ban ai ka jingiatreilang bad ka Society ban kyntiew ïa ka thaiñ, u la ai jingmut ruh ba kin kham shim khia ban kyntiew ïa ka lariti (culture) bad haba kren halor kane ka phang, u kongsan u la ïathuh ba hapoh ka jylla Meghalaya ha une u snem ba la leit ki la don haduh 12 lak ngut ki briew kiba la wan ban jngoh ïa ka jylla Meghalaya bad 50 hajar ngut na ki, ki dei kiba na bar ri, kine ki la wan ban jngoh kyrpang ïa ka culture jong ka jylla Meghalaya, u la ong ruh ba kane ka tamasa ka donkam ïa marketing ka ban kyntiew ruh ïa ka kamai kajih bad halor kane u ong ba donkam ban don da ki briew kiba la don jingtip bha ha ka marketing khnang ban kyntiew ïa ka thaiñ, nalor kine u ong ba donkam ruh ïa ki pathai khubor, kynthup ki social media.
U Dr Nongtdu, u la pashat jingtip ruh ba ka don ka jait skim ba thymmai jong u snem 2022 ka ‘Home Stay Scheme’ bad ïa kane ka skim ki briew shimet kim lah ban ioh hynrei ki ïoh tang ki kynhun kum ki society, u la ai ka jingkitbok kitrwiang ïa ka society ba kan nang kiew shaphrang na ka por sha ka por ban kyntiew ïa ka thaiñ bad ïa ka jylla hi baroh kawei.
U President jong ka Sonapyrdi Tourism and Economic Development Society, u bah K.S.Suchiang, la ai ka jingkhublei ïa baroh kiba la wan ban sakhi lang ïa kane ka tamasa ba la pynlong ha kane ka sngi bad ong ba ka jingthmu ba pynlong ïa kane ka tamasa ka long ban kyntiew ïaka kam jngohkai pyrthei ha ka thaiñ, kumjuh ruh ban pynpaw sha ka pyrthei ïa ka jingitynnad ka mariang kaba kup rong jyrngam bad ong ruh ba ka society ka don ka jingthmu ban pynneh pynsah ïa ka mariang, ïa ki mrad kiba don ha ka mariang kumjuh ruh ban pynpaw sha ka pyrthei ïa ka jingitynnad ka khlaw Narpuh Wildlife sanctuary kaba pynneh pynsah ïa ki jait mrad bapher bapher, u pynpaw ruh ïa ka jingangnud ba ka sorkar kan ithuh ïa kane ka jaka kaba don ka wah Lukha, kum kawei na ki jaka jngohkai pyrthei ba kane kan ïarap ïa ki nongshong shnong jong ka thaiñ ha ka ïohkam ïoh jam.
Katkum ka jingkren u bah Suchiang, la sngewthuh ba kane ka wah Lukha ka la long ka shlem kamai ja kpoh jong ka mynnor, u la ong ba ha ki por ba mynshwa, ki nong shong shnong jong ka thaiñ ki ju im ja kpoh na kane ka wah ha kaba ki ju kamai da kaba die dohkha bad pyndap ïa ka ïing ka sem bad phah skul, pyn nang pynstad ïa ki khun, hynrei na ka daw ka jingwan lynshop kiba bunjait ki jingpynjakhlia, kane ka wah ka kylla sniew noh, hynrei mynta kane ka wah ka la sdang ban bha biang da ka jingshim khia ka Society bad ki bor district ban pynkhuid pat ïa kane ka wah, u la ong ruh ba ïa kane ka tamasa Lukha Festival la sdang nyngkong eh ha u snem 2019, la ïoh ban pynlong ruh ha u snem 2020 bad na ka daw ka jingdon ka jingpang COVID-19 ha u snem 2021bad 2022 khlem lah ban pynlong ïa kane ka tamasa bad mynta ka STEDS ka la ioh ban pynlong biang ïa kane ka tamasa kaba lai kaba phuh ba phieng.
Kiba la ai jingkren ki kynthup ruh u Symbud kongsan, u bah Vinod Lapasam, uba dei u waheh Shnong barim jong ka shnong Cheihruphi, u Waheh Shnong Sonapyrdi, u bah Edimon Lamare, u Secretary Shnong Sonapyrdi, u bah Daiapherbha Lamare, u Representative jong ka company Star Cement, u Devander Bansal bad kiwei kiwei.
Ha kane ka sngi ka la don ka jingïakop jngi,ka jingïakop king lieng, ka jingïakop shon dur, ka jingïalehkai football harud wah bad janmiet pat ka la don ka jingïakop Miss Lukha 2023, ïa kane ka tamasa yn pynkut lashai ka sngi jong ka 4 tarik u rymphang.