Lada ka Mamata ka ong ym donkam National Party ha WB ngin jubab ym donkam TMC ha Meghalaya : NPP

Jowai, Rymphang 03 : U National President ka NPP bad Myntri Rangbah ka Jylla Conrad K Sangma ula ong ba lada ka Trinamool Congress (TMC) ka kheiñ Nongwei ia ka BJP bad kiwei ki National Party ba kin wan synshar ha West Bengal, hangne ha Meghalaya ruh ka TMC ka dei ka Nongwei bad ka Jylla ka don la ki jong ki party kiban synshar dalade ialade kumta ym donkam ia ka TMC ruh ha kane ka jylla.U Conrad ula kren ïa kane na ka rynsan ïalap elekshon jong ka NPP ba long hynne ka sngi thohdieng ha Jowai, haba pyllait ruh ïa ka manifesto elekshon jong ka party kaba la ai kyrteng “People’s Document-Vission 2023-2028”.
U Myntri Rangbah ula pynkynmaw ïa ki paidbah ba ka TMC ka dei ka party kaba wan na West Bengal. Ula pynkynmaw ruh ïa ka jingkren jong ka hehduh ka TMC Mamata Banerjee ha kaba kala pynbna ba ka West Bengal ka don ïala ka jong ka party bad kam donkam ïa kiwei ki National Party ban batai ïa ki kumno ban synshar ïa ka Jylla. Da kane ka juh ka nongrim, ula ong ba ka TMC ka dei ka party nongwei ha Meghalaya bad ka Jylla ka tip kumno ban phikir ïalade.
“Lada ka Mamata Banerjee ka ong ba ka BJP bad kiwei ki National Party ki dei ki Nongwei ha West Bengal, kane kajuh ka nongrim kan treikam ha Meghalaya ïa ki ruh, namar kiwei ki National Party hakhmat ka Mamata ki dei ki Nongwei, kumta ruh ka TMC ka dei ka nongwei ha Meghalaya. Ngi don la ki jong ki Party, ngi tip kumno ban pynïaid ïalajong. Ngi la burom ïa ka Mamata Banerjee namar ka burom ïa u Nongïalam (L) PA Sangma hynrei ka elekshon hi ka ïapher” ula ong.Haba kdew ba ki briew hapoh ka TMC ki dei ki juh kiba la aibor 8 snem ban synshar ïa ka Meghalaya, hynrei kim shym la lah ban pyntyllun shakhmat ïa ki kam, u Conrad ula ong “Ki briew kiba don ha ka TMC ki dei ki briew kiba phi la dep ban ïatreilang lang, phi la ïohi ïa kaei kaba kila leh bad kaei kaba kim shym lah ban leh. Mynta kila wan da ka uniform ba thymmai, ban ai ki jingkular ïa phi ba kin khmih ïa ki ishu bapher bapher, ki paidbah kila dep ban pyrshang bad dep mad ïa ki”.
Une u Khliehduh ka NPP ula antad ruh ba ka TMC kan nym jop palat 2-3 seat ha kane ka elekshon ban wan ha Jylla bad kane hi kan long hapdeng ka jingïaleh kaba jur bha. “Nga thikna ba ka TMC kan nym jop palat ia 2-3 seat ha ka Jylla jong ngi. Kam pher katno kila kren ha ki jingïalap elekshon hynrei haba ka result kan mih ha ka 2 tarik Lber, kin sa ïoh tang 2 seat duh, phi sa peit ha kane ka sngi. Kane ka dei kaban jia ïa ka TMC” ula kynthoh da ka jingngeit kaba skhem. Ula ong ïa ki paidbah ka Jowai baka NPP kan sa wanphai biang da ka jingjop ba bun paid duh bad kyntu ïa ki ba kin nym pynsepei kai ïa ki vote jong ki sha ka TMC, ka bym don lawei ha Jylla.“Ki paidbah ka Jowai kim dei ban pynsepei kai ïa ki vote bad kim dei ban thep ïa ki vote jong ki sha ka party ka bym don jingmut (TMC), ka bym lah ban leh eiei na ka bynta jong ki hadien habud. Phi hap ban rai, ki paidbah ka Jowai kin hap ban rai ïa kaei kaba ki kwah ban leh” ula ong.