Shong dum bun tylli ki shnong ha thaiñ Byrnihat, ïakhun ka MeECL ban pynïeng ïa ki dieng post ba la khyllem

Nongpoh, Jymmang 22: Bun tylli ki shnong haka thaiñ Byrnihat kila hap ban shongdum namar ka jingkhyllem jong ki post elektrik, ba naka liang ka tnad MeECL mynta ka dang trei shitom ban pynbiang ïaka bording elektrik ha katei ka thaiñ bad ban pyrshang ban pynïeng biang ïaki post bala khyllem.
Kum ban shu pynpaw ba ka kawei ka trok kaba la kit palat pud ïa u rnga kala leit ban rat ïa u sainar elektrik hajan CMJ Breweries ha Rajabagan haka thaiñ Byrnihat, haka step jong ka sngi u Blei haduh ba uwei u post elektrik ba kham heh u la kdiah syndon ha surok bad pynkhyllem ruh bun kiwei pat ki post elektrik ba kham rit namar ka jingbam sarang bala pynlong ïa bun tylli ki shnong ban shong dum khlem bording naduh ka sngi u Blei.
Katto katne ki riew paidbah naka thaiñ Byrnihat haba kren bad u nongthoh khubor kila pynpaw ka jingsngewkhia kaba jur halor katei ka jingjia tang namar ka jingkit palat pud jong kawei ka trok kit rnga ka pynsajia pat ïakiba bun ki paidbah haka thaiñ Byrnihat bad kiwei kiwei ki shnong ba marjan kiba la hap ban shong dum mynta la kumba 3 sngi, ba ki paidbah kim ioh shuh ban trei ban ktah ban pyndep ïaki kam ki jam khamtam ki samla pule kiba pynkhreh ïaki eksamin bad ki jingpule bapher bapher jong ki.
Naka liang ki paidbah kila pyntip ruh baki nongtrei jong ka tnad MeECL kila pyrshang katlah kat ïai ban pynïeng biang ïaki post elektrik kiba la khyllem ha katei ka thaiñ, bad lehse ka jingduh bording jong ki paidbah kan dang neh sa kumba katto katne sngi tad haduh ban da lah ban pyndep bad pynbiang lut ïaki post elektrik bad ki sainar bala dkut ha katei ka jaka.