Nongpoh, Jymmang 23: Ka kynhun jong ki nonglute da ka jingpyntieng ïa ki nongtrei kawei ka kor tylliat maw ki la ioh ban rong tuh ïa ka song pisa kaba T. 80 hajar tang da kaba ki riam kum ki shipai bad ba ym lah ban ithuh dur khmat jomgki.
Kane ka jingjia ka la jia ha kawei ka Kor tylliat maw ha Umduba ha ka thain Killing, Ri Bhoi District kumba ha ka por 1 baje ei ei dang step phyrngap ha kaba ki la don kumba 7 ne 8 ngut ki la leit ban lute na katei ka kor tylliat maw.
Kumba la ïathuh da u Heh Pulit ka Ri Bhoi, la ong ba ki bor pulit ki la ioh jingtip halor kane ka dei hadien ba ki la ïa kawei ka phone call ba la pyntip shaphang kane ka jingjia bad halor kane ka jingjia na ka liang ki bor pulit jong ka Khanapara Police station ki la hiar mardor ban pynlong ïa ka jingtohkit halor kane ka jingjia.
La ïathuh ruh ba kitei ki kynhun nonglute ki dei kiba riam kum ki shipai ha kaba ki la wan beit sha katei ka kor tylliat maw bad pynap ruh da ki kynja sulai ba shna da ki dieng tang ban pyntieng ïa kitei ki nongtrei katei ka kor tylliat maw ha kaba ki la ioh rong haduh T. 80 hajar hadien ba ki la ioh ban rung syndon ha ka jaka thep pisa (Cash counter) jong katei ka kor tylliat maw.
La ong ruh hadien ba la poi ki bor pulit kitei ki runar ne ki kynhun nonglute ki la phet krad tang hadien ba la ioh rong tuh ïa ka song pisa bad na ka liang ki bor pulit ki la pynlong ïa ka jingtohkit khnang ban ioh jingtip halor katei ka jingwan lute kitei ki runar ïa katei ka kor tylliat maw.
Shuh shuh, la ong ha kane ka jingjia ym shym la don kano kano ka jingjia ba sngewsih pyrshah ïa ki nongtrei jong katei ka kor tylliat maw bad lait noh tang ba kitei ki runar ki la ioh rong ïa katei ka song pisa. Na ka liang ki pulit ka Ri Bhoi ki la dep register case halor kane ka jingjia bad ki dang pynlong ïa ka jingtohkit kaba bniah ban ioh kem ïa ktiei ki runar kiba la nud ban leh ïa kitei ki kam lute, ong u heh pulit ka Ri Bhoi.
