Ba sngewkhia ka JSM leit buh jingthoh halor u surok Intermediary Jowai By-Pass

0

Jowai, Jymmang 23: Ka Jaiñtia Students Movement (JSM) Western Region mynta ka sngi ha ka jingïalam, u General Secretary Bah Chanskhem Suchiang bad u Working President WR, Bah Jordan Rymbai da ka jingsngewkhia mynsien halor ka jingsah kut kali ha sor Jowai kaba la palat, kaba ktah shaba palat ïa ki nongleit nongwan naduh ki khynnah skul, ki nongtrei bylla ki nong kamai kali haduh ki nongtrei sorkar.
Kumta kala leit buh da ka jingthoh ha u Executive Engineer PWD Road South Division ha Jowai ban dawa bad kyrpad ban pynkhreh project ne Sanction thymmai ban shna kyrkieh ïa une u Surok Intermediary Jowai By-Pass uba ka Seng ka hadien ka jingsurvey jong ka, ka lap ba lada shna bha ïa une u Surok u ban ïarap shibun bah ban pynduna ïa ka jingdheng kali ha Sor Jowai baroh kawei namar bun ki kali private bad Commercial ruh ki ïaid beit na une u Surok wat lada u sniew ruh.
Na ka liang ka Seng ka pynpaw ka jingsngewnguh bad ai ka jingïaroh kaba khraw ïa u Local MLA ka Jowai Constituency, ma Wailadmiki Shylla uba la trei shitom ban wanrah u Surok babha ha baroh ka Sor Jowai bad ki jingkieng thymmai khnang ban suk ki nongleit nongwan hapoh Sor Jowai baroh kawei kaba wanrah ka jingkyrkhu kaba khraw bad pynitynnad ïa ka Sor Jowai.
Shuh shuh ka Seng hadien ka jingïohlad ban ïakren bad u MLA ka Jowai u ma Wailadmiki Shylla ula kular ban wad ki lad lynti ban pynbha ïa une u Surok By-Pass Jowai, na ka liang ka Seng kam artatien ba lyngba ka jingshim khia jong u MLA ba une u Surok By-Pass Jowai ruh un bha u miat khnang ban wanrah ka jingsuk ka ïaid ka ieng ha Sor Jowai.

Leave A Reply

Your email address will not be published.