Shillong, Rymphang 28 : Ka ïing bishar High Court jong ka jylla mynta ka sngi Baar kla shong bishar ïa ka mukotduma PIL kaba ïadei bad ka jingtih bad jingkhaïï be-aiñ ïa u Dewiong haka jylla. ïa katei ka mukotduma PIL la ujor da u Champer M Sangma.
Ha katei ka hukum, ka Division Bench kala pynpaw ba ha hukum kaba la dep ban pynmih teng, kala pynpaw ba ka sorkar Meghalaya bad Assam ki la dep ban aiti ïa ki Affidavit ki jong ki.
U Nongmudui ula kam ba u Respondent No 14 udei u Khliehduh ba pynïaid beaiñ ïa katei ka kam.
U Nongmudui ula kdew ba u don ïa ki sabut da ki kot ki sla ban pyni ba watla u don u dewiong uba nabar uba la wan rung shapoh ka jylla hynrei kumba 40,000 MT u dewiong ula mih na ka jylla Meghalaya.
U Nongmudui ula ong, ba katei kan ym jia lada dei ba kam don ka jingtih be-aiñ ïa u dewiong bad ka don ruh ka rukom treikam ha kaban pynïaid ïa u dewiong.
Kan ym don ruh kano kano ka jingartatien ba u Respondent No 14 un pynslem khnang ïa ki kam ki jam.
Ka ïingbishar kala bthah ïa u Muktiar uba mihkhmat ïa u Respondent No 14 ba udei ban phah ïa ka Affidavit kaba ïadei bad katei ka jingmudui bad kumjuh ruh ha kaba ïadei bad ka Affidavit kaba la aiti da ka sorkar jylla bad sorkar Assam hapoh shi taiew.
La buh tarik ban shong bishar biang ïa kane ka mukotduma haka 13 tarik u Lber.
