Shillong, Rymphang 28: Hadien baladep ka jingïathep vote, kiba bun ki paidbah ki la sdang ban phla ïa ka jingïoh pisa na ki kyrtong ha kane ka elekshon ba dang shu dep.
Kiba bun ki nongthep vote kiba la ïoh ban ïakren ki la ïathuh ba ki ïoh pisa shisha ha kane ka elekshon. Ki don kiba la ïathuh ba ki ïoh 1000 tyngka. Don kiba la phla ba ki ïoh 2000 tyngka. Don ruh kiba la ïathuh ba ki ïoh 5000 tyngka.
Hynrei ki don bun ngut ruh kiba la phla ba kim shym la thep pat sha ki kyrtong kiba la ai pisa ïa ki, hynrei ki thep pat shawei. Haba la kylli kaei ka daw ba ki leh kumne, kiba bun ki la ong ba namar mynta ki la ïoh jingpynshai bad sngewthuh ba kane ka pisa kaba la sam sha ki shuwa ka elekshon kadei tang ka jingpynbieit ban ïoh vote kam dei satia ka jingai jingïarap. Bun ki Samla ki la pynpaw ruh ba kane ka jingleh kumne ka long ban ai jingsneng ïa ki Kyrtong kiba ju mlien ban sam pisa por elekshon bad lada baroh baroh ki leh kumne, kaba mut kan poi ka por ba ki Kyrtong kin nym nud shuh ban sam pisa por elekshon bad kin hap ban pyntreikam hok beit ïa ki lad jingïarap ne ki skhim kiba dei hok jong ki paidbah.
Ki la ïathuh ruh ba kiba sam pisa ym dei tang kawei ka Party, hynrei la jan baroh ki Party ki la sam pisa lait noh tang iwei ar ki Party ki bym sam pisa hi tdot. Ki don bun ruh kiba shim pisa na ki Party bapher bapher tang ba ka vote pat ki thep sha ki Party ne Kyrtong bym ai pisa.
Hynrei ha kajuh ka por ki la pynpaw ruh ba lehse kiba long kum kine kiba shim pisa bad bym ai ka vote ki dang duna than, hynrei kiba bun hi ki dang leh hok bad ai hok ïa ka vote jong ki sha kita ki kyrtong kiba ai pisa.
“Ka por ka la dei ba ki paidbah kin ai jingsneng ïa ki kyrtong kiba mlien ban sam pisa namar kane ka wanrah ïa kaei kaei ka bym sngewtynnad bad pynjaboh ïa ka synshar khadar”, ki la ong.
Shuh shuh ka jingïoh lum khubor ka ïathuh ba wat lada ki Exit Poll ki pynpaw ïa ka jingïoh Seat ki Party, hynrei kiba bun hi ki kyrtong kim ïoh jingkheiñ satia, bad kim nud kam ba kin jop beit na ka daw ba ki paidbah ki shet kylla.
