Pynursla, Rymphang 28: Ha kawei ka jingjia kaba sngewsih ha ka wah Ranei kaba don harum ka shnong Nongsohphan kaba don harum Pynursla ha ka sngi Nyngkong ha kaba arngut ki rangbah ki la duh ei ïa la ka jingim katba uwei pat u la mynsaw namar ka kali kaba ki shong ka la thung baji sha riat. Kane ka kali kaba ki shong ka don ïa u registration number WB 12 A 7277
Kine ki arngut ki rangbah kiba la khlad noh ki kyntup ïa u Bah Haliroi Kongwieng uba dei ruh u Rangbah Shnong ka Nongsohphang bad u Bah Cornelius Khongrymmai 41 snem ka rta bad u Bah Baklajied Kongwieng 26 snem uba la lait im na kane ka jingjia ba sngewsih. Haba ïakren bad u Mawphor u Bah Baklajied u la ïathuh ba kane ka jingjia ka dei katba ki dang wanphai na ka jaka ba ki wan sum ban leit phai noh sha shnong.
“Dei ynda ngi la dep ban wan thep vote ngi la leit ban sum sha wah hynrei ynda wanphai noh na ka daw ka jingbakla u nongñiah ka kali kaba ngi shnong ka la thung baji sha riat kaba jylliew bha bad ha kane ka jingjia namar nga la hap napoh kali bad sakhut ha shiteng riat ba nga lait im katba arngut pat ki paralok jong nga ki la mad ha kane ka apot kaba sngewsih,” u la ong. Shuh shuh u la ïathuh ba hadien ba la jia katei ka jingjia ka shimpor ïa u haduh shikynta ban kiew shalor ka riat ban pan jingïarap na ki briew kiba ïaid lynti lyngba katei ka jaka.
U la ïathuh ba um shym la kynmaw shuh ha ka por kumba katno baje eiei ka jia kane ka jingjia hynrei u kynmaw ba dei kumba 8 baje eiei janmiet ba u kyndit na ka jingïapler ba u sa sngewthuh ïa kane ka jingjia.
