Shillong, Rymphang 28: U kyrtong ka All India Trinamool Congress (AITC) na Ranikor konstitwensi u Tengsim G Momin hynne ka sngi ula ujor sha ki Pulit pyrshah ïa u Sailus Sangma halor ka jingkynnoh pynjah ïaki kot ki sla ba donkam (Original Documents)jong u.
Haka ejahar sha u Superintendent of Police (SP) ka South West Khasi Hills, u Tensim G Momin ula kynnoh ba u Sailus Sangma u ba shong ba sah ha Goalsora South West Khasi Hills District u ba dei ruh u Adviser/Election Agent ula pynjah ïa ki kot ki sla (Original Documents) kum ka Nomination Papers, Voter ID Transfer Paper bad kiwei kiwei ki kot ba donkam.
Ula kynnoh ba u Sailus ula pynjah khnang ïa kine ki kot ba donkam da kaba kwah pynthoh bria ïa u bad ïa ka Party baroh kawei.
Halor kane naka liang u Tengsim Momin ula kyntu ïa ki bor Pulit ban shim sienjam pyrshah ïa u Sailus namar kane ka jingleh jong u ka lah ban wanrah ka nam sniew ïa u bad ïa ka Party.
