Shiteng dorjon pynliem ka Manipur ïa ki thei Assam, mad namrem ki thei Meghalaya ha ka Mizoram

By Mawphor News Desk On Nov 10, 2022

Shillong, Naiwieng 09 : Ki thei ïalehkai phutbol U-17 ka Manipur ki la pynliem haduh 6-0 kol ïa ka kynhun ïalehkai jong ka Assam ha ka lympung 2nd North East Olympic Games 2022 kaba long ha ka sngi Ba-ar ha madan MFA, Third Ground, Polo.
Ha kawei pat ka jingïakhun, ki thei Meghalaya pat ki la mad ïa ka jingshah rem kaba 4-2 kol ha ka kynhun jong ki thei ïalehkai ka Mizoram.
Na ki 6 tylli ki kol jong ka Manipur ha kane ka sngi la ïoh ban thep haduh lai tylli tang ka L Babina marwei kata ha ka minit kaba 11, 29 bad ruh ha ka minit kaba 72. Katba ka Meghalaya pat watla ka ïoh ban thep kol nyngkong tang ha ka minit kaba 13 lyngba ka Makrisha Songthiang pynban ka la mad ïa ka jingshah rem.
Hynrei dei tang ha ka minit kaba 26 ba ka Lalremruati ka la ïoh pynïakhaid lyngba ka bol kaba khyrwit kham najngai ha shwa ba ka Sandra BN kan khyrwit sha shi kol ha ka minit kaba 28.
Ka jingïakhun ha ka kylla miet ka la nang itynnad shuh shuh hadien ba ka Mizoram ka la ïoh ban thep sa ar kol kaba pynlong ïa katei ka kynhun ban ïoh lamkhmat da 4-1 kol lyngba ka Lalremruati ha ka minit kaba 65 bad sa shi kol pat lyngba ka Lalrinmawi ha ka minit kaba 73.
Na ka liang ki thei ka Meghalaya da ka jingïakhun tyngeh ki la ïoh biang ban pynkhih jar lyngba ka Ïarap Nongrum na ka bol ba la pashat da ka Sunalinda Ïawren.
Watla ka kynhun ka la ïoh mynsiem lyngba katei ka kol kaba ar hynrei ka Mizoram kam shym la ailad satia bad tad haduh ban da kut ka por ïalehkai, ka jingïakhun ka la neh da 4-2 kol.
Haba phai pat sha ka Manipur, katei ka kynhun ka la don haduh hynñiew ngut ki thei ïalehkai kiba don ha ka India-U17 bad kane ka la pynlong ïa ka Assam ba kan ym lah ban shan watla ka kynhun ka la ïakhun tyngeh.
Nalor ki kol jong ka Babina, ïa kiwei pat ki kol la ïoh ban thep da ka L Shelia Devi ha ka minit kaba 12, ka S Lynda Kom minit kaba 40 ryngkat bad ka shi kol ba thep hi da ka thei ïalehkai na Assam ha ka minit kaba 55.
Ka jingïalehkai mynta ka sngi jong ki U-17 ki kynthei, ka Arunachal Pradesh kan ïakhun pyrshah bad ka Mizoram ha ka Group 2 ha ka por 11 baje mynstep, bud pat sa ka Sikkim pyrshah ïa ka Manipur na ka Group 1 ha ka por 3:30 baje janmiet.