Shillong, Naiwieng 09 : Kum ka dak jingai mynsiem bad kumjuh ban kitbok kitrwiang ïa u Samla Lamangkynsai Kharbuli, uba dei na ka shnong Lawsohtun bad uba la shah jied ban pynïasoh bad ka club ïalehkai Indian Super League, ka Hyderabad FC ha ka Under -15, u Bah Hamletson Dohling MLA ka Mylliem Constituency u la noh synñiang da ka song pisa sha utei u samla.
“Nga ngeit skhem ba une u samla un dang lah ban wanrah nam bad burom ïa ka shnong ka thaw bad ïa ka Jylla hi baroh kawei ha ki sngi ki ïa kiban dang wan,” ong u Bah Hamletson Dohling.
Kum ban pynkynmaw hangne ba u samla Lamangkynsai Kharbuli uba dei u rangap kol uba ju shah hikai ha ka shlem jong ka PFR, u la shah jied na bynta ban don lang ha katei ka kynhun ki U-15 jong ka Hyderabad FC kaba deiruh ka lahduh jong ka Indian Super League (ISL) jong ka samoi 2021-22.
