Shillong, Risaw 04: Ka Mylliem Lum ka la pynthikna ïa ka jaka ha ka semi phainal jong ka lympung Shillong Sports Association First Division 2026 da kaba ïakhaid mar 1-1 kol bad ka Mawkhar SC ha ka jingïalehkai ba khatduh jong ka ha ka Group B ha ka sngi Saitjaiñ.
Haba phai sha ka jingïakhun, ka Mawkhar ka la pynkhihjar dang kloi ha ka kylla step lyngba u Mackiven Shyrkon (4′) hynrei ka Mylliem Lum ka la pynïakhaid ha ka kylla miet lyngba u Eliastar Nongsiej (68′).
Kane ka shi point ka long kaba kongsan na ka bynta ka Mylliem Lum, namar ka pynsah ïa ka ha ka kyrdan ba nyngkong jong ka Group B da 7 point. Watla katta ruh, ka Mawkhar (5 point) kan dang ïoh ïa ka lad ban knieh ïa katei ka kyrdan katba ka Mylliem Lum kan nym hiar palat ïa ka kyrdan ba ar wat lada ka Pohkseh (4 point) ka jop ïa ka jingïalehkai ba khatduh pyrshah ïa ka Nongrim Hills. Kane kadei namar ba ka Mylliem Lum ka don ïa ka rekod jingjop pyrshah ïa ka Pohkseh (ha ka por ba ka Mylliem Lum ka la pynliem da 5-0 ïa ka Pohkseh SC ha ka 19 tarik Nailur).
Kumjuh ruh, ka Nongkrem ka ladep ban pynthikna ïa la ka jong ka jaka ha ka semi phainal na ka Group A, katba kawei pat ka jaka yn ïaknieh hapdeng ka Malki bad ka Nongthymmai.
Ka jingïalehkai SSA 1st Division 2026 ha kane ka Sngi Nyngkong kan long hapdeng ka Malki pyrshah ïa ka Mawtawar, ha ka por 12 baje mynsngi.
