Shillong, Jymmang 25: U Paiem Alban Fredrick Syiem ha ka sngi nyngkong u la shimti ïa ka kam kum u Acting Syiem jong ka Hima Mylliem ha ka jingpynspong pynspaiñ da ki Myntri ha ka jingïalang kaba la long hapoh Hima Mylliem.
Hadien ba la dep ban shimti ïa ka kam na ka liang jong u Paiem u la ong ba ka pisa kaba dei hok jong ka Hima bad kaba dei ban siew sha KHADC haduh mynta ym pat lah satia ban siew bad kane ka pisa ka dei kumba T. 3 klur tam ym kumba la don kiba kynnoh ba ka dei kaba T. 3 hajar klur.
Ïa kane na ka liang jong u, ula pynpaw haba kren sha ki lad pathai khubor ha ka sngi Nyngkong hapoh ophis jong ka Hima Mylliem.
Ha kaba ïadei bad kane haba kylli ïa ki sienjam ba un treikam nangne shakhmat na ka liang jong u Paiem u la ong ba ka thong jong u kaba hakhmat duh ka dei ban wanrah ïa ka jingsynshar kaba khuid ba suba kaba dei ruh kaba la angnud da baroh.
Na ka liang jong u ula ong ha kane ka sngi hi un thaw noh ïa ka Executive Dorbar jong ka Hima khnang ban lah ban pynïaid ïa ki kam jong ka Hima bad ban lah ruh ban pynïaid beit ïaid ryntih ïa ki kam jong ka Hima kaba dei ban long naduh mynta ka sngi.
