Elekshon MP : Ki paidbah ki la ïanujor, kim shongshit shuh kumba long arsnem mynshwa : President NPP EKH
Shillong, Jymmang 25 : Ka elekshon MP shiteng samoi kaban sa long shen na bynta ka Shillong Parliamentary Constituency kan pher bha lada nujor bad ka elekshon ha u snem 2024 namar ba ki paidbah ki la ïoh ban nujor lut ha baroh ki liang, ong u President jong ka NPP East Khasi Hills, Bah Gavin Mylliem.
Haba kren bad ki lad pathai khubor, u Bah Gavin u la ïathuh ba ha u snem 2024 ki ïohi ba ka jingshong shit ki paidbah ka pher bha hynrei katba nang ïaid ka por ynda ki la ïoh ban ïanujor ïa ka rukom treikam ki la sdang ban sngewthuh.
“Ngi ïohi ba ka jinglong jong ki paidbah mynta ka la ïapher baklybak lada nujor bad ka elekshon MP ba dang shu dep ha u 2024. Ki paidbah mynta ki la kham stad bad ki bishar khambha ha ki kam, khamtam haba ki la ïohi ïa ki kam pynroi kiba bun ba kane ka sorkar ba ïalam da ka NPP ka leh,” u la ong.
Da kaba pynkynmaw ba kajuh ka party kaba jop ha ka elekshon MP ha u 2024 ka ïoh ruh ban ialam ïa ka bor synshar ha KHADC, u Bah Gavin u la ong ba kane ka la nang plie lad shuh shuh ïa ki paidbah ban ïoh ïanujor bad bishar kham bniah shuh shuh halor ka rukom treikam.
“Ngi ngeit skhem ba u paidbah hi khatduh u ïoh ïa ka lad ban bishar ïa ka rukom treikam. Hynrei kumba nga ju ong ba donkam ban kham pyni kham bun ka kam ban ïa ka ktien, kata hi kadei kaba ki paidbah hi ki khmih lynti,” bynrap biang u Bah Gavin.
Nangta u la ong ruh ba ha kawei na ki jingïalang ba dang shu lah shen ha Mylliem u la ïohi bad ïoh sngew markhmat ba kumno ki paidbah mynta ki la sdang ban peiphang shaphang ka politik.
“Kawei ka long ba kum ka party ngi donbok haduh katta katta ba ngi ïoh ïa Dr. DRL Nonglait kum u kyrtong ha kane ka elekshon MP shiteng samoi, u riewrangbah uba shemphang, uba ïar ka jingmut jingpyrkhat bad u briew uba la noh synñiang haduh katta katta ïa ka jylla khamtam eh kum u nongïalam ka Khasi Author’s Society,” ong u Bah Gavin.
Une u Nongmihkhmat u la pynpaw ruh kumba ka long hi, ka party ka don ka jingsngew skhem ba kin lah kiew bun bha ka jingkyrshan ym tang ha ka East Khasi Hills hynrei ha baroh kawei ka Shillong Parliamentary constituency.