Shimkhia ka DS Rangad ban pynneh pynsah ïa ki matti u mynbarim kiba don bad ki khanatang na menbarim

Khliehriat iaiong 21: Ka shnong Rangad ka dei kawei na ki shnong ha East Jaintia Hills District kaba don shibun ki jaka kiba itynnad kiba iahap dur bad kiba don jingmut ban pynlong ïa ki kum ki jaka jngohkai pyrthei bad kiba bun ki jaka kiba itynnad kiba don ha Rangad ki don ruh ka khanatang kiba naduh mynbarim, ka Dorbar shnong Rangad, naduh ki snem kiba la leit ka la shim khia ban pynneh pynsah ïa kine ki matti uba rim bad ban pynlong ruh kum ki jaka jngohkai pyrthei.
La ju sakhi ruh ba ki don bun ki briew ieid mariang kiba ju wankai sngewbha, wan kai pyngnad bad wan bamkhana sha shnong Rangad, ki paidbah kiba wan ki ju sngewtynnad ban pynlut ïa ka por jong ki ha ka madan phlang jyrngam kaba heh bad ba ïar ba ju tip kum ka madan Pdeiñ Rangad, kumjuh ruh ki ju leit ban jngoh ïa ka kshaid Umbryleiñ, ki Moowknor, ki mawbynna ba kynthup ki maw kynthei, ki maw shynrang kiba dei ruh ki maw ba la buh nam da ki longshwa man shwa naduh hyndai.
Sawdong ka Pdeiñ Rangad (ka madan ba heh ba ïar) ki don ki khlaw ba kup rong jyrngam, ka don ruh ka kshaid Umbyrleiñ bad ha trai eh jong kane ka kshaid ka long kum ka jaka jngi kaba itynnad (natural swimming pool) ba la pynwandur da ka mariang, kumjuh ruh ki don ki maw knor (Mooknor), ki maw bynna kiba ka Dorbar Shnong Rangad ka la shim khia ban pynneh pynsah ïa kine ba kin neh pateng la pateng.
U Waheh Shnong jong ka shnong Rangad, u bah Damon Lamo, u la iathuh ba kiba bun ki briew wat kiba na bar shnong ne bar jylla ruh ki la sdang ban tip ïa ka shnong Rangad bad ki la sdang ruh ban wan jngoh ïa kane ka shnong, la ong ba don kiba wan da ki bos, ki kali heh kali rit ruh ban wankai pyngnad bad wan bam khana.
Ha kaba iadei bad ka madan phlang kaba heh bad kaba ïar u ma Damon Lamo u la iathuh ba “Kane ka jaka jong ngi (Pdeiñ Rangad) ka dei ka jaka kaba naduh ki myn barim bad ki longshwa jong ngi ki shong ki sah ha kane ka jaka hyndai, hynrei dei na ka daw ba wan ka khlam kaba jur ha kata ka por na kata ka daw ki nongshong shnong ki phet bad kynriah noh na kane ka jaka bad ki shnong noh sha kawei ka jaka ba ju khot ka Moolynsngat, ki iehnoh-noh ïa kine ki dienjat ha kane ka jaka ban ioh ban sakhi da ki long dien, da ka jingdon kine ki maw sah nam kum ki Mooknor ki Mawbynna, ki maw shongthait ba bunjait ki maw kiba la buh sah nam ki nongtmmen, kumta ngi ki long dien, ki khun ki kti jong kane ka shnong ngi pynbha pynmiat, ngi ri, ngi sumar bad pynneh pynsah ïa kine ki dien jat sahnam jong ki myn ba rim bad ngi don ka jingmut ruh ban pynlong ïa kane kum kawei na ki jaka jngohkai pyrthei bad malu mala ngi dang lah hi ban tip ïa ka khanatang hyndai jong ki myn barim”
La ong ruh ba ka Dorbar shnong Rangad ka la ju pynlut da ka pisa shnong ban pynbha pynmiat ïa kane bad ruh ba ki nong shong shnong ki ju trei wat da ka bor met ruh ban pynneh pynsah ia ki dak uba myn ba rim bad la sngewthuh shai ruh ba na ka liang ka sorkar hi kaba na ka tnat jongkhai pyrtehi (tourism) kam pat shym la don satia kano kano ka jingai jingiarap ïa ka shnong ha kaba u waheh Shnong ruh u la ong “Na ka liang ka sorkar te pat don kano kano ka jingiarap, kine kiei kiei ba ngi pyntrei ki dei na ka pisa shnong ba la ia syniang ki paidbah bad ngi la pynlut haduh kumba T. 2 lak tyngka tam khlem da kheiñ ïa ka bor met jong ki paidbah nongshong shnong namar ngi da kwah ban pynneh ïa kine pateng la pateng”
U la iathuh ruh ba hangne ki dang don shibun shibun kiei kiei kiba dang donkam ban pynbit pynbiang kum ki surok, ki kynroh, ki lynti iaid kjat ban poi sha trai jong ka kshaid Umbyrleiñ, ki jingker (fencing) bad kiwei kiwei.